…150 hóben a partisipá den klínika pa futbolista i portero…

KRALENDIJK-JÜLI: Durante siman tras di lomba un total di 150 hóben entre edat di 9 pa 19 aña ku interes i pashon pa e deporte di futbòl a finalisá e ‘Soccor and Keeper Clinic’ ku éksito. E klínika a wòrdu organisá dor di Digicel i ekipo di futbòl Jong Bonaire den Stadion Kralendijk i tabata tin un durashon di 4 dia. For di dia 15 di yüli te dia 19 di yüli a hasi uso di Stadion Kralendijk pa hóbennan ku tabata interesá den siña téknika di futbòl nobo, i e vèlt di Uruguay pa esnan ku tabata interesá den bira “Keeper”. Pues a dividí e grupo pa por a duna mihó atenshon na e hóbennan. Ademas di esaki por a konta ku presensia di e embahador di Smartphone DL 600 i futbolista popular, Justin Michel, kende a duna un man i siña e hóbennan algun téknika riba vèlt. Tabata djabièrnè último ku a klousurá e klínika, sakando e futbolista i e “Keeper” mas disipliná di henter e klínika. Futbolista mas disipliná a resultá; Srta.Matthew ku a risibí un BB 9900 di Digicel miéntras e ‘Keeper’ mas disipliná a resultá; Diangelo Martijn ku a risibí un Blackberry Playbook di Digicel. Srta. Irvinia Daantje, relashonista públiko pa Digicel Boneiru a ekspresá bisando, “No ta promé bes ku Digicel ta pone su skouder bou di un proyekto asin’aki. E ta yena nos ku un sintimentu di satisfakshon sabiendo ku Digicel a kontribuí na desaroyo positivo di nos hóbennan den un proyekto deportivo. Durante di e temporada di fakansi eskolar ta un momentu perfekto pa e hóben dediká tempu na su ‘pasa tempu’ preferí, pues e klínika aki tabata perfekto pa no solamente motivá e hóben, sino tene su kondishon i dun’é oportunidat di rekreá den un forma sano. Digicel i ekipo di futbòl Jong Bonaire por mira bèk riba un eksitoso klínika”.