WILLEMSTAD – Djabièrnè último Universidat di Kòrsou Dr. Moises da Costa Gomez (UoC) a entregá bùl na un total di 312 graduado. E seremonia a konta ku presensia di ministernan
Marilyn Alcala-Wallé, Zita Jesus-Leito i Quincy Girigorie, diferente miembro di Parlamento, miembronan di hunta di supervishon, representantenan di konseho di studiante, famia i amigunan
di e graduadonan. Tabatin un gran kantidat di personanan presente na e graduashon anual di UoC. Durante e seremonia ofisial Rector Magnificus, dr. Francis de Lanoy, a splika ku tabatin un total di 266 graduado bachelor i 46 master, repartí entre e sinku fakultatnan ku UoC ta konta. Mayoria (73%) di e graduadonan aki ta femenino. E graduado di mas hóben tin 20 aña i esun di mas edat
tin 65 aña. E studiantenan ta prosedente di 15 diferente pais: Kòrsou, Aruba, Boneiru, Hulanda, St. Maarten, Venezuela, Colombia, Sürnam, Repúblika Dominikana, China, Portugal, Costa Rica, Trinidad & Tobago, México i India. Fuera di e Rector Magnificus, dr. Angelino Viceisza, a fungi komo e orador prinsipal di e anochi, dirigiendo su mes na e graduadonan i e públiko presente. E valedictorian Roël Gonzalez di e Fakultat Tékniko a tene un spich masha animá. Despues di e akto ofisial tur graduado i nan famianan a selebrá e momentu históriko riba tereno di UoC. Registrashon di studiante nobo lo tuma lugá e aña aki riba djabièrnè 7 i djaluna 10 di yüli 2017 di 8:00 di mainta pa 15:30 or.