Willemstad-  Fundashon un Man pa Hubentut, e fundashon ku ta hasi trabou balioso na bienestar di muchanan den bario di Souax, durante un tremendo selebrashon djadumingu último a selebrá su di 10 aña di eksistensha.  Na e okashon aki e fundashon a tene un enkuentro ku tur e muchanan, algun di nan ya adulto, ku a partisipá na aktividatnan despues di ora di skol serka e fundashon.  E enkuentro a tuma lugá na e sede di e Fundashon na Souax. Tabatin vários presentashon di e hóbennan ku a i ta bishitá e fundashon su aktividatnan manera presentashon show di baile, músika di viol toká pe e hóbennan, “show” di drùmbènt i hopi mas. Fundashon Un Man pa Hubentut a nanse for di e pashon di su dos fundadónan, Sr. Rendy Speranza i Sra. Nardha Jansen, pa hasi algu pa e muchanan di barionan di Souax i bisendario, kendenan 10 aña pasá no tabatin ningun kaminda di bai despues di ora di skol sino di keda riba kaya.  Awe e sentro, bou di guia di Speranza i Jansen, ta ofresé un programa kompletu i bon strukturá pa no únikamente tene e muchanan for di kaya pero mas aun pa forma nan pa nan bira suidadanonan bon formá den nos komunidat.  Durante e selebrashon ku beneplasito por a tuma nota di kon e aporte di e Fundashon un Man pa Hubentut a kontribuí na formashon di awe suidadanonan fuerte i bon forma. Un i tur a gosa di e talentonan di tantu e muchanan ku aktualmente ta  partisipá den e aktividatnan despues di skol na e sentro komo di esnan ku den pasado tabata bini e sentro. Fundashon un Man pa Hubentut lo sigui ofresé diariamente un programa kompletu i bon strukturá pa no únikamente tene e muchanan for di kaya pero mas aun pa forma nan pa nan bira suidadanonan bon formá den nos komunidat.