Willemstad – Dia 10 i 11 di yüni último JCI IOBA Curaçao a organisá un Master Class ku un tema inovativo pa generá fondo pa  e organisashon di siudadanonan aktivo entre 18 pa 40 aña. Den 2010 e organisashon a introdusí e konsepto asina yamá “Master Class” ku ta 2 dia di training intensivo pa profeshonalnan den diferente ramo. E Master Class a kuminsá ku enfoke riba profeshonalnan di merkadeo i a sigui krese i amplia ku e sektor di rekurso humano. Durante e último 5 añanan a dediká atenshon riba diferente tema inovativo, of mihó bisá “trendy” riba nivel internashonal. E aña aki, JCI IOBA Curaçao a skohe pa pone énfasis riba Responsabilidat Sosial di Kompania, ku ta un tema di diskushon ku a bolbe lanta kabes. Despues di reseshon finansiero, mas i mas hende rònt mundu a bira konsiente di e responsabilidat di kompania òf instansia komersial pa e komunidat i pais ku nan ta biba aden. Tur meta di kompania ta pa krea ganashi, pero netamente e tema di CSR ta pone nos realisá ku esaki mester ta posibel di tal forma ku ta tene e hende, su bario, komunidat of pais den konsiderashon. Tur empresa mester yega den un balansa pa hasi negoshi étikamente i alabes responsabel. Pa años nos ta mira ku instansianan ta hasi ganashi i un mínimo di esaki ta bai pa algun donashon ku kisas ta yuda un grupo selektivo. Durante e 2 dianan di kurso, partisipantenan por a siña i komprondé ku un kompania sosialmente responsabel ta tene kuenta ku detayenan manera di unda bo ta importá bo produkto i merkansianan. Ku si e interkambio hasí ta unu responsabel of ta unu ku ta kumbiní solamente e komersiante. Tambe a reflekshoná riba e aspekto di kolaborashon kaminda Sr. Kurt Schoop komo trainer a hasi diferente ehersisio ku e partisipantenan. For di Estadonan Uni, e trainer Patrick Knight a para ketu na e aspekto legal i derechonan internashonal. Pa na final e trainer Sra. Okama Ekpe-Brook a presentá e aspekto di Nashonnan Uní i nos ròl den mundu. Durante e 2 dianan, partisipantenan a siña ku Responsabilidat Sosial di Kompania ta atendé e 3 P-nan ku ta “People”, “Planet” i “Profit”, pero tambe a agregá “Passion” (pashon). Ku tur loke nos ta hasi den bida nos por logra mas éksito pa medio di kolaborashon, tantu individualmente komo den empresa of kolektividat. Ku Responsabilidat Sosial Korporativo ta kuminsá ku kada un di nos komo individuo, ku mester ta mas konsiente i eksigí mas di nos trabou, produkto i servisionan ku nos ta konsumí. Diferente kompania ta hasi donashon tur ora ku e pensamentu ku nan ta Sosial I Responsabel, pero esaki a ser demostrá di no ta e úniko vehikulo ku ta determiná esaki. Despues di a organisá e 2 dianan intensivo di training, JCI IOBA Curaçao a lansa mesora “CSR” komo proyekto pa asina sigui konsientisá tantu kompania komo nos komunidat tokante Responsabilidat Sosial. JCI IOBA Curaçao ke yama danki na PwC Dutch Caribbean, Insel Air i Go Weekly ku nan koperashon ku a hasi e proyekto eksitoso.