WILLEMSTAD – Maduro & Curiel’s Bank N.V. huntu ku Innovatie Centrum Curaçao, MEO i ADECK a uni forsa pa asina sigui kontribuí pa enkurashá e espíritu empresarial i inovativo den nos komunidat. E biaha aki esaki a tuma lugá den forma di un kompetensia pa e mihó inovashon di sea produkto, servisio òf proseso empresarial ku yama I Factor TV (“I” di “innovation/inovashon”) i lo keda transmití na televishon. I Factor ta un programa di 6 episodio ku lo keda transmití na TeleCuraçao entrante Novèmber 2013. Meta di e programa ta pa informá komunidat di e importansia di inovashon, duna sugerensia kon pa inová i na mes momentu e programa lo inkluí un kompetensia kaminda partisipantenan ku ideanan komersial inovativo por kompetí kontra otro. Di e manera aki MCB su departamentu di Empresa Chikí ta kontribuí na duna informashon i alabes ta enkurashá inovashon bou di (futuro) empresarionan. Komunidat a reakshoná hopi entusiasmá ku e programa i un total di 61 persona a registrá ku nan idea pa un produkto, servisio òf proseso inovativo pa partisipá na I Factor TV. Tur e partisipantenan aki a pasa un proseso di “pre-casting” kaminda nan tabatin 3 minüt pa splika e kuerpo di hurado mas detaye di nan inovashon. For di tur e partisipantenan aki a selekshoná e 30 mihó inovashonnan ku dia 29 di sèptèmber 2013 a partisipá na e “casting” na MCB Rooi Catootje. Riba e dia aki e 30 partisipantenan tabatin 3 minüt pa duna un presentashon riba nan idea inovativo i 2 minüt pa kontestá preguntanan di e hurado. Meta di e presentashon tabata pa konvensé e huradonan dikon nan idea ta esun di mas inovativo. E partisipantenan a bin ku nan fanátikonan pa presensiá i apoyánan durante e casting. Tabatin un ambiente tremendo kaminda e públiko grandi presente por a disfrutá di tur e 30 presentashonnan di ideanan inovativo i tambe a keda entretené pa Rhyddm. Maduro & Curiel’s Bank tambe a rifa algun premio. Hurado a evaluá e presentashonnan riba e siguiente kriterionan: originalidat, impakto di e inovashon, faktor realisabel pa merkado, kreatividat i kalidat di e presentashon. For di tur partisipante e hurado a selekshoná un total di 8 finalista ku lo sigui elaborá riba nan inovashon den e siguiente etapa di I Factor TV, ku lo keda transmití na televishon. E 8 finalistanan a resultá di ta e siguiente personanan i nan inovashon.
- Richard Martina – Chrome webpage customization
- Renato Ignacio App Miappoint, app pa evitá paramentu den rij
- Otelo Reenis – Curacao Classic Boat
- Archel Kwidama – The Sabios, wega pa mucha
- Jeritza Beaumont – Bolo Pretu den empake di kas di kunuku
- Raymond Jamanika – Simulator pa siña kore outo
- Geert Huisman – Mobile Alarm App
- Raycine Decaster Godfried – C2B card
E 8 finalistanan lo sigui kompetí den e programa i tin chèns di gana un suma di NAf. 7.500,-; un trofeo ku e título di Innovatieprijs 2013; i finansiamentu garantisá di Maduro & Curiel’s Bank N.V. pa un máksimo di NAf. 10,000.= . Maduro & Curiel’s Bank N.V., Innovatie Centrum Curaçao, Adeck i MEO ta e spònsernan prinsipal di I Factor TV, pero tambe un danki ta bai na tur e otro spònsernan ku a hasi e “casting” di djadumingu último posibel ku ta: UNA, W. Sound & Images, Margil Party Rental, Digicel, Texas Alaparia, Quiznos, Coca Cola i Rhyddm. Sigui desaroyonan di I Factor TV dor di ‘Like’ e página di Facebook kaminda bo por depositá bo voto pa un di e 8 finalistanan i asina yuda bo partisipante faborito gana e premio apsoluto. Keda pendiente tambe pa e promé episodio di I Factor TV den Novèmber 2013. 
Maduro & Curiel’s Bank N.V. ta keda É Banko pa empresa chikí ku ta enkurashá inovashon!