Indikashonnan di e promé Monitòr di Konyunktura pa 2018
WILLEMSTAD – E indikadornan ta mustra un empeoramentu di e konyunktura ekonómiko den e promé mitar di 2018 kompará ku 2017. Por papia di un adaptashon mas abou di e plannan di invershon den e promé mitar di 2018. Kontrali na esei, e ahuste mas ariba di e plannan di personal posiblemente por ta basá riba e speransa ku den e di dos mitar di 2018 e konyunktura lo drecha.
E Business Survey
E Business Survey ta un enkuesta ku Kámara di Komèrsio i Industria di Kòrsou ta efektuá. Ta hasi pregunta na empresarionan tokante desaroyonan ekonómiko resien i un tòpiko spesial. Dos biaha pa aña ta hasi e enkuesta.
Ta usa e resultadonan di e enkuesta, ku tin di haber ku desaroyonan ekonómiko resien, pa kompletá e Monitòr di Konyunktura di Kámara. Dos biaha pa aña ta formulá e Monitòr di Konyunktura i e ta basá riba datonan ku diferente empresa i organisashon ta suminstrá.
Repartishon di datonan
E kantidat di esnan ku a respondé ta 624. A puntra esnan ku a respondé pa indiká den kua zona di Kòrsou nan negoshi ta establesé, kuantu empleado nan tin den servisio, den kua ramo e empresa ta operá i si e empresa ta orientá riba eksportashon (turismo, servisio logístiko internashonal i finansiero internashonal) òf riba e merkado doméstiko (famianan, instansianan lokal i gobièrnu). E análisis ta dirigí riba e distinkshon pa loke ta kandidat di empleado i orientashon riba eksportashon òf merkado lokal. E kantidat di empleado den e empresa ta representá e balor sosial den términonan di empleo i ta tambe un indikashon pa por distinguí empresa chikí i grandi, midí pa nan balor agregá. E distinkshon pa loke ta empresanan di eksportashon i no eksportadó ta hasi posibel pa distinguí si eventual desaroyonan internashonal i doméstiko ta koinsidí.
Imágen di konyunktura di 2018 – Highlights
E indikadornan Portofolio di trabou, Stòk, Aktitut di Pago, Empleadonan i Oranan di Trabou pa kompanianan eksportadó ta indiká ku den e promé mitar di 2018 a surgi un deterioro den e konyunktura ekonómiko. Esaki ta konta prinsipalmente pa e kompanianan grandi i esnan ku no ta eksportá; ku otro palabra, e empresanan ku ta produsí prinsipalmente pa e merkado lokal i ku mas ku e promedio di kantidat di empleado den servisio.
Aparte ku e kantidat di empleado na e empresanan grandi finalmente lo a baha, e otro indikadornan di desaroyonan riba merkado laboral, solisitutnan habrí i puestonan vakante, finalmente no ta mustra niun kambio kla.
Na e kompanianan grandi por papia di un adaptashon drástiko bayendo abou di nan plannan di invershon. Na mes momento e kompanianan grandi ta indiká ku nan ta ahustá nan plannan pa personal mas ariba, anke un tiki mas moderá. Tin sufisiente informashon disponibel pa por mustra nan ahuste positivo di e plannan di personal. E ahuste mas haltu di e plannan di personal posiblemente ta basá riba e speransa pa un mehoransa di konyunktura den di dos mitar di 2018 loke no por konsiderá ainda komo un mehoramentu struktural. E ahuste mas abou di e plannan di invershon ta mustra riba e inseguridat pa loke ta e desaroyonan struktural i posiblemente un ahuste mas abou di e kapasidat di produkshon.