Banco di Caribe ta invitá mayor i yu pa sintonisá e programa

WILLEMSTAD- SEPT 2018: Formashon di mucha i hóben ta masha importante pa nos komunidat. Ta sali for di e punto di bista ku un mucha òf hóben ku risibí guia apropiá tin un base sólido pa su bida komo adulto. Ku esaki den mente Banco di Caribe ta patrosiná un programa di televishon dediká na formashon hubenil. E programa ‘Eduká mi’ lo estrená dia 1 di òktober, 4’or di atardi na Televishon Direct, kanal 13.

Tokante ‘Eduká mi’

Meta di e programa ta pa amplia konosementu di e muchanan riba diferente tema. Lo enfoká riba siensia, kultura, historia, flora i founa, tráfiko i hopi mas, entre otro e importansia di kuminsá spar awe pa e yu tin un base finansiero sólido mañan. Ta transmití ‘Eduká mi’ tur djaluna atardi 4’or, i lo ripití riba djasabra 10’or di mainta. E presentadó Aaliyah Roosje tin 6 aña di edat i ta konektá di un manera masha dinámiko ku su públiko. Den e promé edishon lo trata e tema di ‘Planeta Tera’.

Banco di Caribe komo patrosinadó mayó di e programa ta invitá tur mayor i nan yunan pa sintonisá e programa. Riba djaluna atardi e programa ta perfekto pa despues di skol i riba djasabra mainta mayor i yu por sinta wak e programa huntu. Disfrutá di e promé edishon di ‘Eduká mi’!