Djadumingu pasá 100 mucha a partisipá ku entusiasmo na  e “Earth Day Kidsfestival’ na Kooyman su Megastorenan Zeelandia i  Jan Noorduynweg. Durante e mainta nan por a djòin tur sorto di aktividat prèt i  instruktivo ku un mensahe kla tokante medioambiente. Tambe a anunsio e ganadónan di e konkurso  di klùr di  Earth Day,  i kada mucha a bai kas ku un sertifikado di Earth Day i un stèk di sentebibu ku e mes a planta.

Na e Earth Day festival tabatin yen kos di hasi, manera wak un pelíkula di animashon di Tooby un makaku chikitu, ku ta piki tur loke e plama nèchi nèchi, un skina pa lesa i baila, i e muchanan por a traha obra di man ku material resiklá. Ademas mayornan interesá por a buska informashon tokante aktividatnan di  GreenKidz na e mesa di informashon i por a hasi un donashon chikitu pa kontribuí na edukashon medioambiental grátis i moderno pa kada mucha na Kòrsou.

Marketing Manager Tanja Boon ta wak patras hopi satisfecho riba e dia aki.  “Nos ta haña masha importante pa duna un kontribushon na konosementu  ambiental di mucha. Ta p’esei último añanan nos a adoptá vários skol GreenKidz i a kontribuí na desaroyo di material pa lès GreenKidz. Earth Day ta un motibu pa huntu ku GreenKidz laga mucha anda aktivamente ku konsenshi ambiental na un otro manera.”

Kreadó di GreenKidz Maya Mathias: “Nos ta hopi kontentu ku Kooyman a  hasi e evento aki posibel komo un patrosinadó fiel di GreenKidz. Komo fundashon nos ke stimulá konsientisashon ambiental serka nos hubentut na un manera kreativo i interaktivo, i e festival ta pas presis den e konteksto ei. Danki na e studiantenan di promé aña di Formashon Pedagógiko pa Enseñansa di Fundeshi (‘Leraren Opleiding Funderend Onderwijs’) di UoC, participantenan di  Miss i Mister Teenagers i sekshon hubenil  ‘Interact’ di Rotary nos por a realisá e bunita evento aki.”