Sharlene Starke, docente na St Anna School, a keda satisfecho cu e resultado di e proyecto Earn Your Future. Esaki ta di tres aña cu PwC Aruba a bin duna presentacion den e klasnan y tur aña ta ripara e entusiasmo y interes di e muchanan durante e presentacionnan. Despues di e prome dia e muchanan ta keda papia di loke nan a siña y ta spera ansiosamente riba e di dos les. E proyecto aki su intencion ta pa duna muchanan di 6de klas basischool e conocimento necesario pa nan siña traha un budget, tuma desicionnan financiero riba nan mes y bira mas cauteloso con nan ta gasta nan placa. Tur e informacion aki e muchanan ta haya den dos les di 45 minuut.

Segun juffrouw Starke, e ta kere cu e presentacion ta haci e muchanan mas conciente. Hopi bes mayornan ta druk y no ta tur ora tin tempo pa educa e muchanan riba aspectonan di maneho di placa y spaarmento. E momento aki ta un momento bon pa siña e muchanan con pa maneha nan placa y spaar ya cu aki par di luna nan lo ta bandonando scol basico pa asina sigui cu voortgezet onderwijs y esaki ta un paso mas serca di bira mas independiente den bida. E orarionan di scol lo bira mas largo y kisas e muchanan lo haya mas zakgeld y pues mester siña con pa spaar y uza nan placa bon. Door di prepara for di awor, nan lo ta mas cla pa deal cu nan mesun placa. Mas trempan bo cuminsa, mihor y alabes e muchanan por siña nan famia na cas tambe tur loke nan a haya den e lesnan na scol.

E docente ta gradici PwC pa e tempo cu nan ta hinca den educa e muchanan y tambe pa e material cu nan a duna e muchanan cual ta hopi informativo y educativo.