Djasabra awor di 2or pa 6or den Food Court na Sambil

Preparashonnan pa karnaval 2016 ta kanando. I manera aña bòltu, esta dia 2 di yanüari lo ta apertura di Karnaval 2016. E aña akí meskos ku añanan anterior e apertura di karnaval lo ta den forma di un tremendo Jump Up kombiná ku un Ban Topa karnavalesko na Waaigat. E Jump Up lo kuminsá na Marie Pampoen na altura di hotèl Sunscape i lo tèrminá na Waaigat. E agrupashonnan musikal ku lo ta den e Jump Up ta Gio Fuertisimo, Era i tambe Dreams. Despues ku e parada yega Waaigat e parti ofisial lo tuma lugá pa despues e ambiente sigui kaminda Gio lo buta tur hende presente ariba bou riba Waaigat. Tambe lo bai tin diferente stènt ku kos di kome i di bebe, pues for di 6or e Ban Topa ta kuminsá pa asina kalentá esnan ku t’ei for di tempran riba Waaigat. Pa esnan ku ke probechá di un preis spesial, lo bai tin benta di karchi estilo ‘Early Birds’ dia 19 di desèmber próksimo den e área di Food Court na Sambil. Riba e dia akí so bo por probechá i kumpra bo karchi pa solamente 20 florin. Despues di djasabra tur karchi lo ta na preis normal di 25 florin. Entrega di T‐shirt lo ta dia 29 di desèmber durante ora di ofisina na kantor di Coridja Stars Productions na Klipstraat 6‐8. Durante e aktividat di benta estilo ‘Early Birds’ dia 19 awor, lo tin posibilidat di swaip tambe. Kada persona por kumpra un máksimo di 5 karchi pues no pèrdè e oportunidat aki. Banda di e karchinan pa Jump up lo tin tambe karchianan pa festival di tumba hubenil /elekshon embahadornan di Karnaval/Konsierto GENTZ na preis di Early birds. Adulto Early Bird lo ta fl 20,– i mucha te ku 12 aña lo ta fl 7,50. Preis nòrmasl despues di e dia aki lo ta fl. 25,– pa adulto i fl. 10,– pa mucha te ku 12 aña.

Tambe gustosamente nos ke anunsiá ku Radio Kriyoyo tambe lo bai t’ei bibu ku transmishon kaminda lo trese e mihó tumbanan di tur tempu. Pues, djasabra awor di 2or pa 6or, nos ta topa den e área di Food Court na sentro komersial Sambil pa bo tambe probechá di e Early Birds pa e jump up di apertura i festival di tumba hubenil /elekshon embahadornan di Karnaval/Konsierto GENTZ di karnaval 2016.