Un tremendo espektákulo na Spaanse Water komo parti di Dutch Caribbean Championship.
Willemstad – E evento di windsurf mas grandi na Kòrsou ta djis trai porta, Curaçao Challenge 2019. Riba 11 i 12 di mei, lo tin e kompetensia pa e título di Kòrsou su mihó ‘Slalomwindsurfer’ di 2019 na Spaanse Water. Curaçao Challenge ta wòrdu organisá dor di e Windsurfschool Curaçao, Windsurfvereniging Curaçao I Windsurfvereniging Windfreaks. E aña aki Curaçao Challenge tambe ta un di e tres komponente di e kompetensia di e kampionato 2019 Dutch Caribbean Championship ku ta bou di supervishon di ‘Internationale Funboard Class Association’ (IFCA).
E kampionato ta konta ku mas ku 50 partisipante prinsipalmente di Aruba, Bonaire i Kòrsou ku lo kompetí pa e título máksimo di mihó ‘slalomwindsurfer’ di Dutch Caribbean. E IFCA 2019 Dutch Caribbean Championship ta un kolaborashon entre e asosiashon nan di e islanan Aruba, Bonaire i Kòrsou.
“E meta di e kampionato aki ta pa promové e deporte di windsurf i brinda un kompetensia profeshonal na nos hubentut” Marius van Noort ku ta e presidente di Windsurfvereniging di Kòrsou ta splika.
Ta konosí ku tin diferente kampion mundial lokal den nos region manera Taty Frans i Amado Vrieswijk di Bonaire, Ethan Westera di Aruba tambe Aron Etmon i Rafael de Windt ku ta di Curaçao. “E talento nan aki ta biaha rònt mundu i demostrá ku nos islanan tambe tin kampionnan den e mundu di sùrf. Nos ke sigui ku e tradishon i kuminsa ofresé un kompetensia profeshonal pa nos hóben nan” Marius ta kontinuá.
Tur hende por inskribí nan mes den e kampionato di windsurf aki, hóben, adulto, prinsipiante òf avansá, ku òf sin material i di isla nan ABC òf otro pais. E inskripshon ofisial ta e djabièrnè aki entre 4or pa 6 or na Beachclub Bonita na Sea Aquarium Beach. Kosto pa partisipá ta $60.
Tur hende ta keda kordialmente invitá pa bin wak e espektákulo aki na Windsurfschool Curaçao na Spaanse water. Pa presensia e kompetensia ta grátis pa públiko riba fecha nan 11 i 12 di mei kuminsando for di 10 am i dependé di e bientu e kompetensia por terminá pa 3 di atardi òf promé. Despues di e Curaçao Challenge di e fin di siman aki lo sigui e kompetensia na Aruba (Fishermans Hut) dia 18 I 19 di mei, siguí pa e kompetensia na Bonaire (Sorobon) dia 25 i 26 di mei.
Curaçao Challenge ta wòrdu patrosiná pa Nu Capital, AFAS Curacao, Chogogo, Curacao 4×4, CPS, Gomez Transport NV, VR Shipping, Coca-Cola, Koko’s Jan Thiel, Super Retail, Brummelhuis projects, Obsession Watersports & Gijbels Renting.
Pa mas informashon tokante Curaçao Challenge bishitá e página di Facebook: https://www.facebook.com/curacaochallenge/