Fundashon Cur2Cur di “nos pa nos” ke hasi uzo dje temporada di fakansi aki, pa duna bèk na e komunidat di Kòrsou den forma di un seminario di media yamá Media Boot Camp 2013. E impakto ku medionan di komunikashon tin riba un sosiedat ta enorme. Hende en general su opinion, desishon i emoshon ta wòrdu influenshá i formá dor di e medionan aki. Nos fundashon a tuma e desishon firme di ke impaktá media di un manera positivo pa asina stimulá opinion, desishon i emoshonnan positivo den nos komunidat.

Media Boot Camp 2013

Esaki a kondusí nos na Media Boot Camp 2013. MBC 2013 ta un seminario ku e enfoke pa engrandesé konosementu di media i arte kreativo riba nivel profeshonal. Esaki ta enserá téknikanan di grabashon, fotografia, ‘script writing’, diseño gráfiko, efekto visual, ‘video editing’ i hopi mas. Profeshonalnan riba e diferente areanan aki lo tei presente pa duna workshòpnan di nivel haltu. Durante di e workshòpnan práktiko, partisipantenan lo por buta mesora den práktika loke nan a siña. E seminario aki ta tuma lugá di 1 pa 6 di yüli di 8or pa 4or, na skol Immanuel den Brievengat i ta kosta solamente fl. 20-, pa dia, ku tur material + lùnch inkluí.

Registrashon

Tur persona ku ke registrá por hasi esaki via e página ofisial di MBC 2013 kual ta www.mediaschoolcuracao.com. Riba e sait aki partisipantenan por haña tur sobrá informashon nesesario tokante Media Boot Camp 2013. Pa risibí kontesta riba kualke pregunta lo por tuma kontakto via 560-6611 / 517-1084 òf por manda e-mail na info@mediaschoolcuracao.com.