Ta trata di e di tres fin di siman di e total di shete kaminda e Torneo lo kulminá. Pa e wikènt aki e punto haltu ta sin duda presensia di Hensley Meulens kende lo hasi sake di e promé bala djadumingu awor dia 16 di november na Frank Curiel Ballpark. Esaki lo tuma lugá pa mitar di diesdos (11.30), promé ku e partido Divishon Vruminga tuma lugá. Meulens ta e.o. nos promé pelotero yu di Korsou pa hunga den liga grandi, promé pa dirigi un ekipo den Liga Profeshonal di beisbol Venezolano, promé pa dirigi selekshon di Reino den World Baseball Classic, promé pa okupá un funshon den kuerpo tékniko di un ekipo di Liga Grandi i poseedó di tres renchi komo ganadó di serie mundial. Komishon organisadó pa medio di e komunikado aki ta invitá tur fanátiko di deporte general i di beisbòl en partikular pa trese nan yunan pa bin wak Hensley BAM BAM Meulens, coach di bateo di MLB champion San Francisco Giants. Ban topa ku Hensley i wak’ é tira e promé bala ademas felisit’é òf dun’é man, un abraso, saka potrèt, tuma firma etcetera. Ta apénas  algun siman pasa ku Hensley a logra su di tres renchi komo ganadó di serie mundial ku San Fransisco Giants. E komishon ta sinti su mes honra ku apesar di un skema drùk Meulens ta traha tempu pa nos hóbennan ketu bai demostrando ku e tambe ta “un bon yu di Kòrsou”.