Willemstad – Manera hopi a tuma nota kaba ku na aprel di e aña aki, Maduro & Curiel’s Bank a publiká su sifranan di 2018 den medianan lokal.

Manera ta kustumber, tur aña e Relato Anual di MCB ta bai kompañá pa un tópiko interesante ku di un òf otro forma ta hasi un impakto den nos pais.

E tema di e Relato Anual 2018 di MCB ta nos Museonan; den un buki separá. E buki ta kontené un splikashon di diferente Museo di Kòrsou, Aruba, Bonaire, Sint Maarten, Saba i Sint Eustatius. Ta duna un splikashon di e palabra ‘museo’ riba su mes, informashon kiko kada Museo ta para p’e i ofresé i ku ilustrashonnan masha bunita di kada Museo. Debí na e kantidat di museo riba nos islanan, mester a hasi un eskoho i no por a duna un relato di kada un, pero patras den e buki ta hasi menshon di tur nos museonan, nan informashon di kontakto i orario. Esaki ta hasí spesialmente pa duna onor na e tantísimo museonan ku nos tin riba nos islanan i ku hopi biaha nos no ta para ketu n’e òf traha tempu pa bishitá.

Maduro & Curiel’s Bank ta spera ku e buki aki lo sirbi komo un empuhe pa nos bishitá nos museonan ku ta ofresé un variashon asina grandi di informashon, opheto i eksperensia úniko.

Durante e siman ku a pasa, den un esfera ameno den kurá di Landhuis Bloemhof, MCB a invitá representantenan di e Museonan ku ta aparesé den e buki i a hasi entrega ofisial di esaki na e invitadonan; kual a keda risibí ku hopi amor i kariño dor di esnan presente.

Naturalmente, manera tur aña MCB ta keda ku algun di e bukinan i e aña aki museonan i\òf skolnan i organisashonnan ku ta interesá por tuma kontakto ku MCB na telefòn: 466 1123 si nan ke un ehemplar di e buki. Manera semper naturalmente tantu e Relato Anual komo e buki ta disponibel riba nos website na: mcb-bank.com pa un i tur por disfrutá di dje.