Ta pidi públiko pa bin tempran

WILLEMSTAD.- Preparashonnan pa ‘The Flying Dutch’ ta kanando konforme skema. E sitio kaminda e festival lo tuma lugá ta praktikamente kla i e tarima di 43 meter hanchu tin bisto i tin un toke internashonal, anto esaki ku rason, debí ku e organisashon ta spera un públiko bou di kua lo tin masha hopi bishitante internashonal, entre nan ulandes, bishitantenan for di St. Maarten, Aruba, Colombia i Sürnam ku a bini Kòrsou spesialmente pa e evento aki.

E meta dje organisashon pa pone Kòrsou riba mapa komo destinashon di eventonan musikal a keda lográ.

Debí ku ta premirá ku lo bai bira drùk e organisashon ta pidi e públiko pa sali kas tempran, pa djòin otro i bin den un outo den direkshon di Mambo òf pa bin ku taksi ku lo baha e públiko na porta dje evento.

E krusada di Bapor Kibra lo wòrdu será i einan lo filtra e outonan ku ta bini e evento lo wòrdu permití pa pasa, motibu pa kua ta spera tráfiko pega riba e rutanan ku ta dirigí pa Mambo Boulevard.

Pa e públiko grandi tin lugánan di parker èkstra kreá den bisindario di Mambo Boulevard. E parkeo di mas grandi ta patras di Adventure City i tin lugá di parker tambe riba e bich na Marie Pampun. Lo tin bùsnan ta kore pa hiba e públiko na e entrada dje festival. E públiko ta wòrdu konsehá pa hasi uso dje lugánan aki di parker, debí ku nan ta iluminá i tin siguridat.

Portanan dje festival ta habri pa 5 or di atardi. For di 6 or tin presentashon dje promé dj, e  ganadó resien di ‘Curaçao DJ Battle’, Jay Stax. Pa 6.45 Jeon lo subi tarima pa kuminsá ku su presentashon, e strea rubiano lo presentá despues di algun luna di ousensia pa loke ta trata presentashon na Kòrsou. E organisashon ta spera ku e públiko lo tei presente for di tempran i ta konsehá pa sali kas tempran.

Karchinan pa VIP i ‘standing VIP’ ta ‘sold out’. Karchinan di entrada general ta na benta ainda na e puntonan di benta konosí na Kòrsou i tambe bo por kumpra bo karchi riba e wèpsait dje festival www.theflyingdutchcuracao.com