WILLEMSTAD – Awe un di e restorantnan ku mas aña di eksistensia na Kòrsou a modifiká su nòmber. Belle Terrace, e restorant situá den Avila Beach Hotel i operashonal for di añanan ’70 ku ta konosí pa su platonan i delisianan rafiná lo operá desde awor bou di e nòmber nobo ku ta restorant The Pen. Anteriormente den e aña aki e restorant a pasa den un renobashon ekstenso, esaki tabata e promé paso den e rumbo nobo.

Karakterístika úniko
Restorant The Pen tin kantidat di elemento úniko. Na promé lugá e ta ofresé un toke chik den un ambiente  ku tin sensashon di un “beach house”. Aparte di esei e restorant na airu liber ta brinda un menú eksepshonal basá riba ingrediente i kuminda di den region, tur esaki komplementá ku un bista maravioso riba laman. E ta un sitio outéntiko ku su mes historia, unda por saboriá ingredientenan lokal i regional, sirbí ku un sonrisa kaluroso dor di trahadónan prinsipalmente lokal.

Orígen nomber nobo
Na 1812 e villa La Belle Alliance, ku aktualmente ta ser usá komo lòbi di Avila, tabata un kas pa gobernadornan ingles. Nan sitio faborito tabata e luhoso hardin separá parti patras ku nan a yama The Pen. Situá na eksaktamente e mesun sitio restorant The Pen awor lo karga e nomber di nan hardin preferí. Avila Beach Hotel ku alabes ta e hòtel mas bieu operashonal na Kòrsou,  ta krea ku apertura di e restorant nobo tòg un laso direkto ku e historia amplio ku e hòtel tin.

Por haña mas informashon tokante di e restorant nobo na www.thepencuracao.com.