Willemstad, Djasabra 22 ougùstùs tabatin e promé oudishon di Luna Yen na e sentro di bario Montaña. Un total di 31 mucha/hóben a partisipá den e siman di tayer organisá pa Luna Yen. Den kual nan a haña baile, kanto i aktuashon. Aparte di esei esnan ku tabata interesá pa hasi e oudishon a haña èkstra guia pa asina nan por a hasi nan Oudishon djasabra ku a pasa. For di e 31 mucha/hóbennan kua partisipá 12 a hasi e oudishon. E atardi a start ku presentashon di e grupo di aktuashon. Nan tabata muchanan ku a kaba for di skol i nan tabata kier a pasa un ratu agradabel huntu. Nan a bai kas di un kompañero pa hunga un wega nobo di Mario Bros. Ora nan a kuminsá hunga, nan bin ripara ku nan tabata den e wega anto ku e “partisipantenan” tabata bónus èkstra. Na final di e wega tur a gana i nan a seré ku un baile. For di e bario di Montaña a saka tres finalista ku lo bai e semi final di Luna Yen kual ta Annalee Angelo(Baile), Rulison Specht(Kanto) i Jean Phael Clefort(Kanto). Naturalmente pa a saka e tres finalista nan nos tabatin un kuerpo di hurado ku tabata konsistí di: Harlienne Brazil ( Yenje) ku a husga e parti di kanto, pa baile nos tabatin Jessy Wall i pa aktuashon nos tabatin Donovan Benett. E siguiente siman di tayer lo ta na Sentro di Bario Tera Kòrá. Kuminsando djaluna 31 ougùstùs te ku 4 sèptèmber di mitar di tres pa sink’or di atardi, anto dia 5 di sèptèmber tin e di dos oudishon di Luna Yen na Tera Kòrá mes. Pues si bo tambe ke partisipá inskribí awe mes na teatro Luna Blou. Banko di Caribe, Refineria Isla, Gobièrnu di Kòrsou, Teatro Luna Blou i La Tentashon ta invitá tur mucha/hoben pa bo tambe demonstrá bo talento. Pa mas informashon tokante Luna Yen www.lunablou.com òf nos facebook page: Teatro Luna Blou. Tambe por yama Teatro Luna Blou na 462-2209.