WILLEMSTAD/ Despues ku fin di aña e’la resultá un di e artistanan urban mas solisitá, tantu na radio-emisoranan lokal i den fiesta komo strea invitá, Jaido ta klá pa drenta 2018 ku e promesa di keda prominente. Fanatikonan por spera e mesun dinamismo e aña aki di Jaido i esei ta keda demostrá ora ku den e promé siman di aña, Jaido ta lansa un single nobo titulá “Sin Bo”.  E piesa aki sigur ta un aserkamentu diferente, sigur teniendo na kuenta e konsepto i letranan. E bes aki Jaido tin un ‘romantic groove’.

E piesa ta papia di un amor real, na unda ku e damita ta namorá di e propio kantante pero ta hasi esaki sin interes den fama, plaka i tur loke ser artista ta trese kuné. E damita stima Jaido di kurason. E piesa produsí pa Ox, a keda lansá e siman aki i ya kaba por wòrdu skuchá na radio. Por sigui Jaido riba instagram i snapchat @jaidorick. Fanatikonan por mira e videoclipnan di Jaido riba e Youtube Channel @decodedofficial òf solisitá e track na nan radio preferí. Ademas, por stream riba ITunes, Spotify, Google Play i Apple Music.