Curaçao Clean Up a lansa petishon kontra shushedat ambiental
WILLEMSTAD – Den un karta dirigí na Gobièrnu, Parlamentu i sobrá stakeholder, Stichting Curaçao Clean Up ta hasi un yamada pa tuma medidanan drástiko kontra shushamentu di nos medio ambiente. Riba e website www.change.org habitantenan di Kòrsou por firma e petishon. E fundashon su meta ta pa yega na por lo ménos 8000 firma, esta 5 porshento di poblashon di Kòrsou.
Segun e fundashon e motibu di e petishon ta e kantidat enorme di shushi riba nos isla, tantu shushi riba kaya komo shushi di dùmp ilegal. E shushi ta un menasa pa naturalesa i salubridat públiko, ku den temporada di Corona ta un tópiko mas aktual ku nunka. Ademas e problema di shushi ta menasá di bira asina grandi ku limpiesa ta kasi imposibel.
E petishon ta inisiá un luna promé ku e di ocho edishon di World Clean Up Day Curaçao ku lo tuma lugá djasabra 19 di sèptèmber, den su promé edishon konosí komo Curaçao Clean Up. Durante e promé shete edishonnan 17.800 boluntario a limpia un total di 2,5 mion kilo di shushi. Apesar di esaki e fundashon ta mira ku e atenshon pa un medio ambiente limpi, tambe pa motibu di e krísis di Corona, a floha konsiderablemente e periodo ku a pasa.
“Ku nos akshonnan di limpiesa, ku sosten di nos pueblo, a hasi nos bèst e añanan ku a pasa pa yega na konsientisashon i hasi e isla mas limpi. Pero algun di e kambionan esensial ta for di nos alkanse. Gobièrnu i Parlamentu tin e obligashon moral pa pone e kuadronan korekto pa garantisá redukshon di shushi i eliminá e desaster aki ku ta birando dia pa dia mas pió”, segun Maarten Schakel, presidente di Stichting Curaçao Clean Up.
Den e petishon ta insistí riba diferente punto di lansa, manera redukshon drástiko di gastu di depósito na Selikor, kòntròl mas severo, prohibishon di ‘single-use’ plèstik entrante 1 di yanüari 2021 i un kampaña di konsientisashon i edukashon pa un periodo largu. Ku un kantidat konsiderabel di firma e fundashon lo konsiderá di entregá e petishon na tantu Gobièrnu komo Parlamentu.
Por firma e petishon riba http://chng.it/tHWWvgtNCj Bo haña e link aki tambe via e facebookpaginanan: Curaçao Clean Up i World Clean Up Day Curaçao. E organisashon ta hasi un apelashon na tur boluntario ku ta bai partisipá na World Clean Up Day Curaçao pa tene distansia sosial i tambe pone èkstra atenshon na higiena. Mirando ku e dia di akshon aki lo tuma lugá den airu liber i partisipantenan lo ta plamá riba áreanan grandi, Dr Izzy Gerstenbluth a duna lus bèrdè pa e akshon kontinuá basta kumpli ku e normanan indiká. Lo evaluá un siman promé ku World Clean Up Day Curaçao tuma lugá si por kontinuá ku e akshon di limpiesa.
Entrante 24 di ougùstùs tur grupo òf individual boluntario por registrá pa kontribuí na e World Clean Up Day Curaçao ku lo tuma lugá djasabra 19 di sèptèmber via www.worldcleanupdaycuracao.org.