spesialmente na mamanan rònt mundu titulá ‘Mama’. E videoclip di ‘Mama’ a keda produsi pa talentoso Ryan “QD” Navarro, kual a keda graba durante Tamara su estadía kuminsamentu di aña na Kòrsou. Riba día di mama, Tamara lo bai tin un konsierto di mama aya na Hulanda titulá “A Mother’s Love”.

Después di un temporada sin a lansa produkshonnan propio, Tamara ta bèk ku un kantika nobo riba merkado ku e mes a komposita. Mama ta un palabra universal ku tin e mesun nifikashon den kasi tur lenga i esei ta hasi’e aún más spesial i fuerte. E kantika ‘Mama’ ta dedika na promé lugá su mes mama i alabes na mamanan rònt mundu i tambe n’esnan ku no ta mama biológiko pero ku sí a tumá na nan enkargo e ròl importante i poderoso akí. Tamara ke ekspresa su gratitut pa tur e sakrifísionan ku nos mamanan a hasi, pa asina nos por ta e personanan ku nos ta awe den komunidat. Pa Tamara tur día ta día di mama i p’esei e no ta mira e kantika akí komo un kantika esklusivo pa e selebrashon, pero komo un homenaje i agradesimentu na mamanan henter aña.

Pa e partí di areglo musikal, Tamara a kolaborá pa promé biaha ku e músiko i produktor Elbert Jozefa, ku no ta deskonosí den e farándula lokal. Elbert a traha riba diferente produkshon i hitnan di artistanan lokal manera entre otro Aemy NiaFeliz i tambe Heinrich ‘Richie Rich’ Pieters. Tambe e ta miembro i areglista di e grupo di Seú HPA, ku tur aña ta hasi un aporte grandi na nos kultura den entre otro Kantadó Mayó. Tamara a kolaborá tambe rib’é kantika akí ku e talentoso kantante i rapper Sherman Smith. Sherman ta un hóben ku pa un tempu kaba a bini ta hasi furor ku su kantikanan den e género urbano na Kòrsou. Tamara ke gradisí Arcas BV i Avila Beach Hotel pa nan aporte pa realisashon di e proyekto akí i tambe na e tremendo visagista Diantha Rodrigues Pereira di Didicakes i Brauhaus pa su toke final.

E kantika ‘Mama’ ta kai den e género di ‘World Music’, ku ya pa algún tempu kaba Tamara a bini ta eksperimentando kuné i e ta den su lenga materno, Papiamentu. Tamara mes ta referí na e su músika komo ‘Caribbean Soul’. Den kuadro di lansamentu di e kantika akí, Tamara lo bai tin un evenementu den e konsepto di ‘Food & Concert’ na Hulanda titulá ‘A Mother’s Love’.  E evento lo tuma lugá na Teatro Mooi Weer & Zo, na Rotterdam riba djadumingu 12 di mei 2019, ku ta riba día di Mama. Den un ambiente ameno i íntimo, e kantante lo duna homenaje na tur mama, akompañá pa un banda ‘live’ unda e lo kompartí su historianan personal. Durante e konsierto akí, su single nobo ‘Mama’ lo keda interpretá pa promé biaha. Chèk riba www.tamaranivillac.com, pa más informashon di benta di karchi. E kantika ‘Mama’ lo ta disponibel riba entre otro Spotify, iTunes, Apple Music, Deezer i tur demás plataforma di músika online i e videoclip ya ta disponibel riba YouTube. Por siguí Tamara riba ritnan sosial na www.facebook.com/TamaraNivillac of Instagram@tamaranivillac. Pa presentashon por manda un mensahe na info@tamaranivillac.com.YouTube di ‘Mama’: Tamara Nivillac – Mama – Ft. Sherman Smith (Prod. by Elbert Jozefa)