… Pabien Jayson Persaud…

WILLEMSTAD:- Na e anochi di premiashon di e empresario hóben mas kreativo di Kòrsou a premia Jayson Persaud di Aquafari komo e ganador di The Creative Young Entrepreneur Award 2014. E selebrashon ku a tuma lugá riba djaweps 5 di yüni na Papagayo Beach Club tabata un éksito i ta klousurá e programa Creative Young Entrepreneur Award (CYEA) 2014 “Injecting the Entrepreneurial DNA”. Sr. Dito de Kort, Manager Director Commercial Affairs di Banco di Caribe a hiba algun palabra komo patrosinadó prinsipal di e CYEA. Sr. D’angelo Alexander, Presidente di JCI IOBA Curaçao tambe a hiba algun palabra di gradisimentu. Sr. Bonner Gibbs di Find You Consultancy tabata e orador pa e anochi. Ela papia tokante aspektonan ku ta importante ora ta hasi negoshi aki na Kòrsou. E programa di CYEA ta rekonosé, honra i selebrá empresarionan eksepshonal i e ròl di kreatividat den nan éksito. Alabes otro meta di e programa di CYEA ta pa yuda desaroyá nos ekonomia dor di kultivá ‘entrepreneurship’. Jayson Persaud e ganador di CYEA 2014 a risibí un chèk di 10,000 florin for di Banco di Caribe e patrosinadó prinsipal. Tambe e la risibí premio di KORPODEKO, Infortrans i Extura. Mariluz Manuela di Naturals Curaçao i Marjorie Placencio di the Loan Specialist a keda premiá komo e promé i di dos finalista. JCI IOBA (Involvement of Banda Ariba) Curaçao ta un organisashon lokal ku ta afiliá na Junior Chamber International (JCI). JCI ta e federashon mundial di lidernan entre 18 pa 40 aña ku ta dediká na trese kambio positivo den nos komunidat. Pa mas informashon tokante CYEA 2014 bishita www.iobacyea.com òf bishita e página di facebook di JCI IOBA Curaçao.