ORANJESTAD, Aruba – November 2015: E aña aki, durante di e celebracion di Aruba Aloe su di 125 aniversario, ta dedicando extra atencion na e exito extraordinario di un e productonan cu ta entre esunnan miho bendi. E producto cu originalmente a carga e nomber “Burn Balm” tin un historia interesante, como un di e productonan cu a evolve durante di añanan hunto cu e compania.

Burn Balm a wordo desaroya na 1965 y a subi mercado cuater aña despues. Na 1983, e producto a wordo mehora considerablemente pa dr. Koos Veel, e actual director di operacionnan di Aruba Aloe, y Profesor H.E. Junginger, Ph.D, un specialista den tecnologia farmaceutico di Universidad di Leiden.

Cu un formula y un paki nobo, e Burn Balm nobo a wordo poni riba mercado na 1989. Den un tempo cortico Burm Balm a bira un producto comun pa uzo na cas pa hendenan local y e tabata basta popular cu turistanan pa uzo como tratamento pa kemadura di solo.

Na 1995,  un amigo di dr. Veel na Belgica a sufri un accident cu a resulta den kemaduranan severo, y Veel a yud’e door di manda un caha completo di Burn Balm p’e na e clinica di kemadura di Universidad di Gent. E resultadonan tabata increibel, y e dokternan na e clinica di e universidad tabata kier mas Burn Balm pa purb’e cu otro cliente. Veel a complace cu nan, y e resultadonan a asombra e dokternan.

Burn Balm tabatin un fragrancia cu no tabata ideal pa tratamente di victimanan di kemadura y Veel atrobe a traha un formula nobo pa e crema. El a sigui haci cambionan na e formula di e crema poco poco, di acuerdo cu e informacion cu e tabata ricibi for di e universidad. E producto nobo cu a evoluciona como reaccion riba e necesidadnan di e clinica di kemadura a haya e nomber Alhydran.

For di tempo cu nan a cuminsa uza e producto aki, mas di 2000 pashent a wordo trata cu Alhydran na Universidad di Gent, y Alhydran awo ta uza pa dokternan y hospitalnan den 29 pais rond mundo, specialmente pa cuido di heridanan despues di cirugia. E aña aki Alhydran a ricibi e prestigioso certificacion ISO.

Durante di e proceso di desaroyo di Alhydran, e version di Burn Balm pa uzo diario a sigui riba su mesun curso di exito. E producto a haya un imagen nobo na 2002 y un nomber nobo, esta “Ultra Intensive Aloe Cream”, na 2011. Awendia Ultra Intensive Cream ta un di productonan miho bendi di Aruba Aloe. E crema rico y calmante por wordo uza pa cuero seco, irita of sensitivo. E concentracion halto di aloe vera puro tin un efecto extraordinario contra grawatamento.

Rico cu zetanan di coco y jojoba, vitamina y antioxidante, e crema ta ideal pa cura cuero cu a sufri cualkier tipo di daño.

Pa e celebracion di su di 125 aniversario y e exito grandi di Burn Balm, Aruba Aloe ta lansa un promocion special. Clientenan cu cumpra $75 of mas na productonan di Aruba Aloe ta ricibi como regalo un Ultra Intensive Aloe Cream version di edicion special pa e celebracion di e di 125 aniversario.

Aruba Aloe ta invita comunidad di Aruba pa participa na e campaña special, cu un total di AWG. 1500 na premio. Pa participa pa gana AWG. 250, AWG. 500, of AWG. 750, Aruba Aloe ta pidi pa esunnan cu por tin potret, documento y artefactonan relaciona na aloe (preferiblemente Aruba Aloe) cu ta data for di prome cu aña 1900, pa entrega esakinan na Aruba Aloe. Yama 588-3222 pa mas informacion.