For di dia a anunsi’é, tur hende a kuminsá papia di dje. 4D walk, kiko esaki lo ta? Kon ta bai hasié? Kiko lo bai pasa? Esakinan ta algun pregunta ku kasi henter Kòrsou ta hasiendo referente na e klousura di TDS su gran selebrashon di 30 aña. Djasabra 17 di òktober próksimo lo e bira realidat, ora tur esnan ku a logra di kumpra nan karchi lo bai eksperensia e promé 4D walk den historia. Un kaminata kaminda ku bo lo pasa den 4 dimenshon kual ta Mira, Skucha, Hole i Sinti.

E kaminata mes lo start 7or di anochi en punto saliendo for di SANBIL na e salida Cas Abou ku ta e di 2 entrada riba e kaminda di Veeris. E kaminata lo pasa den Marchena, kaminda lo bai tin e promé eksperensia di e 4D walk. Djei lo e kontinuá via di wèg naar Welgelegen bai para un ratu nèt den e hanchi ku a haña e nòmber kaba di “e Hanchi di Ambiente” ku ta e kaminda ku ta hiba bu “Koredor”.

Despues di e parada kòrtiku aki kaminda tur hende lo bai pasa den e di 2 eksperensia, lo sigui e ruta riba Koredor, pasa dilanti tur hotèl i na Piscadera lo bai pasa den e di 3 eksperensia. Kontinuando mesora pa e entrada “Wèst Punt” di Sambil kaminda ta drenta Sambil bek. Akinan lo bai tin e eksperensia mas grandi ku ora bo kaba di pasa aden bo lo topa e gran selebrashon mes ku un Sorpresa masha grandi mes ku ainda lo no wòrdu divulgá. Manera a indiká anteriormente, espektativa ta hopi grandi i mas ku 60% di karchi ya a bai kaba. Karchi pa e evento aki ta kosta ANG5.00 pa mucha, Adulto ANG15.00 i miembro di TDS ta paga ANG10.00 E karchinan aki por wòrdu kumpra na TDS Vinik Plasa i bo por kumpra karchi akinan usando bo karchi di FunMiles tambe. Balor na FunMiles ta 250, 750 i 500 FunMiles. Naturalmente por kumpra karchi na FunMiles tambe i na Mensings Caminda miéntras tin. Tur anochi entre 6 ku 9 por kumpra karchi na Sambil tambe pero solamente ku bo tarheta di banko òf FunMiles. Djabièrnè dia 16 di òktober por kuminsá bin tuma bo T-shirt(nan) i demas asesorio ku ta bini i naturalmente djasabra 17 di òktober entre 10 or di mainta te ku 5 or di atardi. Esakinan tambe ta tuma lugá na Sambil. Kon bo kier keda afó? Hasi lihé buska bo karchi paso e SOLD OUT ta aserkando. TDS 1st annual 4D Walk, un eksperensia UNIKO!