NOS SELEKSHON NASHONAL LO ENFRENTÁ GUADELOUPE
Tur kos ta kla pa nos selekshon nashonal enfrentá e selekshon di Guadeloupe djaluna 19 di novèmber pa 8’or di anochi den Stadion Ergilio Hato. Ayera nos selekshon ta tin su último seshon di training pa mañan nos bin tur ku tin kontra Guadeloupe. E training aki a bai hopi bon i nos hungadónan ta mentalmente i físikamente bon prepará pa e tremendo partido aki.
Guadeloupe ku a yega djasabra, tambe ta tin algun práktika na Kòrsou i a bin ku refuersonan di Fransia pa e wega aki. Pues ámbos ekipo ta kla pa duna un bon presentashon awe.
Karchinan ta disponibel na FFK, Botika Mampuritu, Beep Beep, 4th of July snèk na Barber, pòmp di gasolin Santa Maria, Sport Spot Boutique & More na Santa Maria pegá ku trùk di pan Komelon i na Restorant Trafasie pegá ku Don Bartolo te ku den oranan di mainta. Por pasa i kumpra bo karchi na tur e puntonan di benta aki te ku 11’or di mainta. E lokètnan di SDK ta habri 12’or di mèrdia pa públiko i lo ta e úniko lokalidat ku lo bende karchi despues di 12’or!
Kòrda ku portanan ta habri for di 5’or di atardi…yega trempan pa evitá e tráfiko!
E preisnan pa e diferente sekshonnan ta lo siguiente:
- SEKSHON A: VIP ta kosta Fl.150,- (inkluso konsumo)
- SEKSHON B: Bou di tribunanan kubrí ta kosta Fl.50,-
- SEKSHON C: Tribunanan no kubrí ta kosta Fl.30,-
- SEKSHON D: Mucha te ku 12 aña ku 60+ ta paga Fl.10,- den sekshon general
E suèternan di e kolekshon nobo di nos selekshon nashonal ta kabando! A sobra masha poko pues pasa lihé buska di bo, na balor di Fl.75,-. Tambe nos a sobra e famoso shalnan di nos selekshon na balor di Fl.25,-. Ámbos optenibel na FFK bou di ora di ofisina. Karchinan ta bayendo manera pan kayente! Hasi lihé kumpra di bo pa bo no lamentá despues!
Nos hungadónan ta pidi pa pueblo di Kòrsou kompletu pa bin apoya nan, nan mester di nos sosten komo e di 12 hungadó!
Nos ta topa, 8’or den SDK!