Willemstad – E di tres CIBC FirstCaribbean Walk for the Cure ta subi kayanan di Willemstad djasabra dia 18 di òktober próksimo.  E aña aki e kaminata lo ta mas grandi ku tur e dos añanan anterior danki na e interes pa e kaminata ku a bin ta krese i patrosinadònan korporativo ku a uni den e esfuerso aki ku CIBC FirstCaribbean pa hasi e kaminata aun mas grandi.  Entradanan generá atraves di e kaminata aki ta bai pa Princess Wilheminafonds asina nan por sigui ku nan trabou balioso den e lucha kontra di kanser na Kòrsou.  E kaminata lo kuminsá den e lugá di parker di CIBC FirstCaribbean na De Ruyterkade 61 den Punda pa mitar di 6 di atardi i lo finalisá mes kaminda. Durante di e último simannan vários evento a keda organisá pa generá fondo pa kuido i sosten na personanan ku kanser rònt Karibe den tur e 17 paisnan kaminda CIBC FirstCaribbean tin ofisina.  Tur esaki komo parti di e di tres CIBC FirstCaribbean Walk for the Cure.  E banko dor di hasi esaki ta uni su mes na su kompania madre CIBC ku pa di 18 aña ta sostené e Run for the Cure di Canadian Breast Cancer Foundation.  Aña pasa CIBC a logra generá US$ 20 mion pa sostené investigashon di kanser na pechu.  CIBC FirstCaribbean e aña aki a oumentá su esfuerso pa generá mas entrada ku e kaminata aki i ta fuertemente riba kaminda pa generá un montante rekòrt. CIBC FirstCaribbean Walk for the Cure na Kòrsou, meskos ku riba e otro 16 islanan di Karibe, tambe ta pinta di bira mas grandi ku nunka. No únikamente e interes di e públiko pa partisipá na e kaminata a krese pero otro patrosinadònan tambe a uni den e esfuerso pa hasi e evento mas grandi.  Asina Deloitte a uní ku CIBC FirstCaribbean den e esfuerso aki riba nivel regional miéntras ku na Kòrsou Curoil, LBH Group, NuCapital, One Media Group,  Adama, Empire Promotions, Wechi, Dolfijn FM, San Perregrino, Stradius entre otro a uni ku CIBC FirstCaribbean komo patrosinadó di e kaminata. E distansha ku lo kana durante di e kaminata aki ta 6 km.  E aña aki lo tin un skina pa mucha por gosa miéntras ku e mayornan ta tuma parti na e kaminata.  Mucha te ku 11 aña ta paga Nafl. 7,50 miéntras ku esnan di 12 aña pa ariba ta paga Nafl. 15,- pa partisipá.  Karchinan ta optenibel na ofisina di CIBC FirstCaribbean. E staf di CIBC FirstCaribbean a bin ta traha duru pa algun siman kaba pa organisá diferente aktividat pa generá fondo.  Un danki speshal ta bai na tur ku a sostené i partisipá den e esakinan dunando nan tempu i sèn pa asina por generá mas tantu ku ta posibel pa e kousa ku gran balor aki. Kanser ta un prekupashon di nos tur debí ku sea un di nos of nos famia por keda afektá pa esaki na kualke momentu.  Hendenan ku ta biba ku kanser mester di nos sosten.  CIBC FirstCaribbean pa e motibu aki ta invitá bo pa ban partisipá na e di tres CIBC FirstCaribbean  for the Cure.