Na kaminda pa CURA DOET 2018

WILLEMSTAD —Djabièrne último, dia 3 di novèmber, a lansa e di sinku edishon di CURA DOET, e akshon boluntario di mas grandi na Kòrsou. Riba 9 i 10 di mart 2018 CURA DOET lo selebrá su promé lustro. Den 2014, CURA DOET a keda organisá pa promé biaha i mesora tabata un eksito rotundo. Tur aña di nobo organisashonnan sosial (entre otro sentronan di bario, skolnan, klupnan deportivo, ‘naschoolse opvang’ ets.) ta inskribí un tarea i risibí sosten di un gran kantidat di boluntario! Den e último kuater añanan e kantidat di tarea i partisipashon di boluntario a multipliká. Por ehèmpel den 2014 132 tarea a keda inskribí, den 2015 un kantidat di 184, den 2016 218 tarea i den 2017 un kantidat di 226 tarea a keda realisá. Alabes e kantidat di boluntario a krese respektivamente di 2600 pa 3900 i den aña 2016 i 2017 mas di 4000 boluntario a duna un man.

Na kaminda pa CURA DOET 2018

Durante e di sinku edishon e organisashon ta selebrá lokual CURA DOET a nifiká pa Kòrsou. E enfoke ta riba e balor di trabou boluntario i e partisipashon di nos komunidat kompletu. Tur aña di nobo organisashonnan sosial  por konta ku sosten di boluntarionan eksistente i nobo entro otro muchanan di skol, kompanianan i nan trahadornan, miembronan di ‘service clubs’ i hopi grupo di famia i amigunan. A bin nota ku despues di CURA DOET tin algun boluntario ku ta keda aktivo na e organisashonnan kaminda nan a partisipá. Ademas di krea lasonan positivo den komunidat riba e dos dianan aki, tambe hopi trabou ta keda kristalisá ku tiki rekurso finansiero i yudansa den forma di donashon di material di sektor privá. E tempu (kalkulá den oranan laboral) ku e miles di boluntario a duna den e transkurso di e último kuater aña tin un balor ekonómiko. Tambe e kontribushon finansiero ortogá na entre otro organisashonan sosial ku ta partisipá ta un impulso ekonómiko pa Kòrsou. Pa hopi di nos CURA DOET tei pa keda.

E forsanan ku ta organisá CURA DOET ta Curaçao Cares i ‘Oranje Fonds.’ E proyekto tambe risibí sosten finansiero di fundashon Fonds voor Sociale Ontwikkeling en Economische Bedrijvigheid, mihó konosí komo Reda Sosial. Curaçao Cares ta un plataforma pa boluntario ku ta forma un brùg entre e boluntario, e kompania i organisashonnan sosial i tin komo meta pa stimulá embolbimentu sosial i aserkamentu entre suidadanonan. Curaçao Cares ta dediká na yuda amplia, reforsá i promové trabou boluntario na Kòrsou. ‘Het Oranje Fonds’ ta sostené inisiativanan sosial den Reino ku fondo, konosementu i kontakto. Nan tin hopi aña ta organisá NLdoet, kual ta e inspirashon pa akshonan na e islanan.

Inskripshon pa tarea i aktvidat

Organisashonnan i inisiativanan sosial por inskribí nan tareanan for di awe riba e wèpsait www.curadoet.com òf por tuma kontakto ku Curaçao Cares na curadoet@curacaocares.org. Esaki lo ta posibel te ku 12 di yanüari 2018. Si un organisashon no tin sufisiente medio finansiero, Oranje Fonds lo por otorgá un donashon te ku 1,100 florin, por ehèmpel pa regla material òf transporte. Aporte finansiero ta limitá. Ku otro palabra…no tarda!

Fin di yanüari, tur persona, famia, grupo di amigu i kompania por inskribí i buska un aktividat spesial pa bin yuda durante e wikènt di CURA DOET, dianan 9 i 10 di mart 2018. Kompanianan por sostené e akshon nashonal aki tambe dor di ofresé un servisio òf produkto ku deskuento pa realisá un aktividat. Pa skolnan, CURA DOET ta un chèns ideal pa laga hóbennan tambe sera konosí ku trabou boluntario. Henter Kòrsou t’aden! Abo tambe?