WILLEMSTAD — E di 8 edishon di e akshon nashonal mas grandi di boluntario, CURA DOET, ta sigui riba djabièrnè 30 i  djasabra 31 di yüli 2021. For di su inisio den 2014, organisashonnan sosial (entre otro sentronan di bario, skolnan, ‘scouting’, kasnan di kuido, klupnan deportivo, krèsh, etc.) ta inskribí un proyekto anualmente i risibí sostén di un gran kantidat di boluntario! Apesar di e temporada difísil nos país ta pasando aden, Curaçao Cares huntu ku Oranje Fonds i Reda Sosial ta sigui ku e akshon pa di 8 bes konsekutivo, pasó hopi ta konta kune.

Awor mas ku nunka, organisashonnan por usa mas man

Ku otro i pa otro. Un lema di sumo importansia pa organisashonnan sosial ku ya a registrá pa e edishon akí di CURA DOET. E aña akí 262 organisashon sosial ku un total di 300 proyekto ta forma parti di CURA DOET 2021. Dor di medidanan di hygenia mará na COVID-19, Curaçao Cares a opta pa un kantidat mas abou di organisashonanan partisipante e aña aki. Durante di e edishon akí, e seguridat di partisipantenan, sea di e organisashonnan sosial òf e boluntarionan ta pará na promé lugá. E dianan di  DOET lo tuma lugá di un forma kreativo i dushi, manteniendo sufisiente distansia sosial. Un petishon ta bai na tur partisipante, pa mantené su mes na e reglanan ofisial, manera preskribí pa Gobièrnu di Kòrsou.

Un yamada na tur boluntario motivá i entusiasmá

E momentu a yega pa pone man na obra i yuda bo progimo. E organisashonnan sosial no por sin boso sosten; awor mas ku nunka! Ku 2 luna mas pa bai promé ku CURA DOET 2021 nos ta hasi un yamada masal na un i tur pa inskribí. Union ta hasi forsa. Bo tambe ta dun’ un man? Huntu, Ku otro i Pa otro, nos por hasi e diferensia.

Skohe bo proyekto faborito òf inskribí awor na:  www.curadoet.com Bo esfuerso ta indespensabel.

Nota pa redakshon

Pa mas informashon por tuma kontakto ku Vicky Trinidad, na e siguiente number di telefòn:  +5999 5400177. Si akaso bo kier pasa personalmente serka nos na ofisina, por fabor tuma kontakto promé via dia telefòn òf e-mail pa traha e sita. Por manda e-mail na: curadoet@curacaocares.org.