Ultimo fecha pa aplica pa premio di Shoco Awards ta diahuebs awor 15 di october 2015

E anja aki, un biaha mas Ministerio di Turismo, Transporte, Sector Primario y Cultura den colaboracion cu Aruba Hotel and TourismAssociation (AHATA),  ta presenta e evento unda Aruba ta premia esunnan cu ta destaca den excelencia di servicio, Shoco Awards. E di 10 edicion di Shoco Awards ta tuma luga dia 29 di november 2015 den Renaissance Convention Center.

Durante un rueda di prensa diamars mainta, consehero di Minister di Turismo, Marisol Sanchez-Maldonado, a splica un poco mas di Shoco Awards, unda inicialmente e tabata un premiacion pa esunnan cu tabata resorta bou di AHATA solamente. Na 2010 Sr. Otmar Oduber, como Minister di Turismo a atende cu e premiacion aki y a mira e importancia di dje pa nos industria principal. Despues di combersacionnan cu AHATA, Ministerio di Turismo a asumi e liderazgo di Shoco Awards y a comberti esaki den un evento nacional. Desde 2011 tur cu ta traha directamente of indirectamente cu turismo na nivel nacional por aplica pata nominado di Shoco Awards. Na 2013 a crea e Shoco Awards Foundation. Marisol Sanchez-Maldonado ta splica: ” Esaki ta netamente lo cual nos tabata boga pe. Entre mas sosten por haya di empresanan, mas grandi nos por haci e evento cu ta premia esunnan cu ta duna servicio di excelencia y ta haci di Aruba e isla mundialmente reconoci cu nos ta awendia pa e calidad di servicio cu nos bishitantenan ta ricibi.” Cada persona den e industria aki, cu tur dia ta duna e miho di nan mes pa hiba Aruba dilanti merece di wordo reconoci y ta pesey e aplicacion pa Shoco Awards tapa tur hende trahando directamente of indirectamente pa nos industria turistico.

Tambe presente na e encuentro cu prensa representante di AHATA, Vanessa Rasmussen. E ta splica un poco mas di e diferente categorianan di premiacion cu Shoco Awards lo tin manera ta  employee of the year, supervisor of the year, manager of the year, young tourism profesional of the year, lifetime achievement award, tour guide of the year, one happy island embassador y student of the year. Vanessa Rasmussen ta bisa: “No tin niun costo di registracion pa aplica. Nos kier encurasha tur empresa no ta importa si ta chikito of grandi pa nomina e trahadonan cu a traves di nan servicio optimal, cu un sonrisa riba nan cara y e atencion inigualabel, ta haci e diferencia den boso negoshi. Si ainda bo no a manda un aplicacion y bo ta interesa di haci esaki, e ultimo fecha pa aplica lo ta diahuebs awor dia 15 di october, 2015 na oficina di AHATA.” Despues di e ultimo fecha pa aplica e huradonan lo cuminsa cu nan trabou pa asina for di e nominadonan, nan saca un ganado den cada categoria. E anochi di premiacion lo ta un evento di gala caminda tur e nominadonan lo wordo honra pa nan trabou y dedicacion, y e ganadonan di cada categoria lo ricibi nan Shoco. Manera ta conoci pa e ultimo añanan , e evento aki lo wordo televisa.

E representante di AHATA ta sigui bisa: “Un anochi di gala manera esaki lo no por ta posibel sin apoyo di e industria y di nos isla en general. Un danki ta bay pa Ministerio di Turismo, Transporte, Sector Primario y Cultura, AHATA, ATA y AAA cu ya caba a confirma cu nan lo patrocina e evento aki.” Nos kier pidi cualkier otro compania cu lo kier forma parti di e evento cu ta reconoce esunnan cu ta destaca den excelencia servicial, pa tuma contacto libremente cu Shoco Awards Foundation y asina sostene y reconoce tur esunnan cu ta engrandece tur dia nos industria principal.” Pa mas informacion y detaye di documentonan necesario hunto cu e aplicacion, por contact Vanessa Rasmussen na 5822607 of via email na vanessa@ahata.com.