Ata e sertámen ku tur aña di nobo Kòrsou kompletu ta pendiente di dje, Miss Playa 2016. Despues di simannan  largu di preparashon intensivo djadumingu awó 21 di ougùstùs , di 5 or di atardi pa 8 or di anochi na Floris Suites Hotel, Coridja Stars Productions lo presentá  e shete beyesanan di Miss Kòrsou den e sertámen Miss Playa 2016.

Tur kos lo start 5 or enpunto kaminda den un fasinante show di apertura eksótiko, e kandidatanan huntu  ku D’Art lo duna inisio na e tema di e atardi aki ‘ Tesoronan di Laman “  Durante di e atardi aki e kandidatanan lo bai tin tres presentashon entre otro ; Introdukshon, desfile di trahe di baño uniformá i finalmente trahe di baño fashionista, kaminda e kandidatanan lo presentá nan kreashonnan di trahenan di baño espektakular.

Den showtime lo bai tin un desfile di trahe di baño espektakular di Atelier Valeria Costa for di Brasil, Show di moda di VBK & Triple 7 i e atardi aki lo wòrdu animá pa DJ RO-1. Body Beach Wellness Club i Soul Spa & Salon tambe ta sumamente orguyoso di por a kontribuí den e preparashon di nos kandidatanan.

Si di berdat bo ke komprobá ku ‘ Beyesa ta muchu mas ku bista por alkansá” bo no por pèrdè e gran evento aki, pues buska bo karchi pa bo tambe t’aden. Karchi ta optenibel na ofisina di Coridja Stars na Klipstraat 6- 8 i tambe serka tur kandidata na balor di fl.35,- Kòrda ku no ta bende karchi na porta. Tene na kuenta ku e entrada pa Miss Playa, ta na e porta di restorant Sjalotte, ubiká dilanti Curaçao Marriott Hotel.