Willemstad, Djasabra ku a pasa Teatro Luna Blou & La Tentashon  tabata e grato plaser di a bishita Sentro di Bario Montaña ku presentashon di Identi-Dance & Hotel La Tentashon. Tur aña di nobo Teatro Luna Blou & La Tentashon ta na diferente bario nan ku algun proyekto edukativo. E periodo di bishita bario nan i trese teater mas serka di nan a start. Un dushi ambiente tabatin wikènt ku a pasa na sentro di bario Montaña. Nan a gosa di un tremendo presentashon di Identi-Dance i Hotèl La Tentashon, komo promoshon pa loke ku tei pasa e próksimo luna den e bario. Un tremendo públiko a gosa di e dos presentashonnan aki i nan a logra inskribí mes ora pa e próksimo proyektonan ku ta na kaminda. Aki nos ta papia di Teater te den bo bario, Luna Yen i Mas teater den bario. Den e siman di 17 pa 22 ougùstùs e tim di Teatro Luna Blou lo ta na e sentro di bario Montaña ku “Teater te den bo bario” ku tayernan di kanto, baile i aktuashon. Alabes e hóbennan ku ta interesá pa partisipá na e kompetensha di talento, Luna Yen, por haña guia i hasi nan oudishon pa e kompetensha di talento.

Bario di Montaña, Sta. Rosa, Fuik i bisindario si bo tin talento òf bo ke siña kualke un di e disiplina di arte ariba menshoná. Kuminsá inskribí for di awor ya bo tambe por forma parti di e  proyektonan ku Teatro Luna Blou & La Tentashon ta ofres’é den e siman di 17 pa 22 ougùstùs. Por inskribí na Sentro di Bario Montaña òf na Teatro Luna Blou. Danki na e komishon di e sentro di Bario Montaña i na señora Linuska ( Poppy ) Martina pa e koperashon i aseptashon. Naturalmente na Fonds voor Cultuurparticipatie, Gobièrnu di Kòrsou,Banco di Caribe i Refineria Isla pa hasi e proyektonan aki posibel. Pa mas informashon por yama Teatro Luna Blou na +5999 462-2209/ +5999 524-8525. Bo por chèk nos página nan wèp. www.lunablou.com. Tambe bo por sigui nos riba facebook: teatro luna blou i la tentashon.