WILLEMSTAD/ Despues di un fenomenal temporada di karnaval maneho di agrupashon musikal Dreams ta para ketu pa reflekshoná riba tur éksito kosechá i tur patrosinadó di promé ora ku a kere den potensial di e banda. “Mi ke gradisí tur músiko- nan ta kasi 50, tambe tur kantante i nan famianan pa e pasenshi. Palabranan ta kai kòrtiku pa gradisí nos patrosinadónan ku a kere den nos; un danki di kurason na Nagico Insurances ku tei pa di dos aña konsekutivo ku nos, tambe na Volkswagen Curaçao, United Distributors i Smirnoff Ice, Kooyman , Amstel Bright, JGM Instalatie, Dolce Vita Occasions, Sra. Consuelo, Vanessa Anthonij, Johainy Lacruz-Albert, Massive Productions, All Signs”, Axel Pikero, direktor musikal di Dreams ta gradisí tur ku di un of otro manera a aportá na éksito di Dreams e temporada aki.  “No por lubidá nos gruponan Estreno Mas Pikete, Crazy Diamonds i Grupo Yupi.”

Maneho di e banda a skohe netamente e temporada aki pa lansa nan logo nobo i mester bisa ku e’la konta ku aseptashon total di parti di fanátiko. Di akuerdo ku Efrem Mambi, un di e representantenan di e tim di maneho di e banda, e logo ta pèrsonifiká e transishon ku e banda a bin ta pasa aden. Ta sali for di un ‘dip’ pa drenta den un era nobo na unda ku músikonan ta pashoná, un poko mas hóben pero determiná- ta aksentuá esaki den un logo trendy, urban i fresh. Mas aleu ta komentá ku Dreams lo drenta studio di grabashon di manera ku pronto lo tin piesa nobo zonando na radio.

Dreams ta konosí pa duna hóbennan músiko i kantante oportunidat klave i ta pèrkurá pa un formashon musikal tambe. No ta un sekreto ku e banda a kontribuí grandemente na formashon di algun músiko hóben ku awendia ta kosechando éksito den farándula i ta algu ku maneho di e banda ta masha orguyoso di dje. Festival di Tumba 2018, ta konfirmá esaki atrobe. Dreams nunka tabata tin temor di introdusí ni kantante ni músiko riba tarima di Festival Center.  Tin Dreams pa largu!