…. ku 2 fecha; 14 di Yüli i 4 di Ougùstùs….

WILLEMSTAD- YULI- 2013: E promé Dreams Beach Tour a resultá un éksito rotundo, ainda ta fresku den nos memoria kon Dreams a paralisá playanan públiko na Kòrsou ku nan ambiente durante di fakansi. “Despues ku aña pasá pa motibunan di kompromiso den eksterior nos no por a organisá nos evento, e aña aki fanatikonan mes a pidi pa bolbe bin bèk ku e ambiente kant’i awa”, di akuerdo ku Pikero. “E idea di organisá un evento di e magnitut grandi aki i kompletamente grátis pa nos fanatikonan por disfrutá ta simplemente pa por yama ‘Danki’. Sin fanátiko i forsa finansiero di nos patrosinadònan nos agrupashon musikal no por drei. Durante di e último añanan nos por tabata kontentu ku ámbos”, Pikero a sigui splika. E konsepto di e Dreams Beach Tour (DBT) ta bon konosí, un serie di konsierto grátis kant’i awa di Dreams i naturalmente tur e kosnan èkstra ku e temporada di vakashon ta trese kuné. E aña aki lo bishitá 2 playa públiko; Djadumingu 14 di yüli Dreams lo ta na Parasasa i djadumingu 4 di ougùstùs na Caracasbaai. Ademas di esaki lo tin e sertámen di Dreams Beach Tour Queen i tambe e dos promé ròndunan di oudishon  pa e ‘Follow your Dreams Song Festival’ ku lo tuma lugá den luna di òktober próksimo. ‘Prik’ e fechanan pa bo den e ‘beach tour’ ku Dreams. Fanatikonan di Dreams mester keda pendiente pa e Dreams Beach Tour 2013 ku ta kuminsá e djadumingu benidero dia 14 di yüli na playa di Parasasa. Dreams lo zona tur su éksitonan bieu i nobo antisipando nan CD nobo ku pronto lo ta riba merkado. Keda pendiente via di medionan di komunikashon i e página di Facebook di Dreams pa mas informashon.