Willemstad – Awenochi e organisashon durante presentashon di e ‘preview’ di e pelíkula argentino Wild Tales, a anunsiá e pelíkula di apertura di e di kuater edishon di Curaçao International Film Festival Rotterdam (CIFFR). E aña akí e organisashon a skoge e pelíkula di Nueva Zeelandia The Dark Horse pa habri e festival. Direktor di pelíkula James Napier Robertson (1982, Nueva-Zeelandia), presente durante e festival, a dirigí na 2009 su promé pelíkula I’m Not Harry Jenson. Su di dos pelíkula e drama The Dark Horse, meskos ku su debut a keda risibí den su mes pais ku entusiasmo i el a gana resientemente e premio di públiko di IFFR na Hulanda. E drama fuerte akí ta konta e historia di bida masha konmoví di Genesis Potoni, un habitante di Nueva Zeelandia ku a fayesé na 2011 ku un disturbio bipolar. Den un komunidat den kua pa hopi hóben ta difísil pa resistí e tentashonnan di e mal kaminda, e ta purba ku hungamentu di skak di bolbe pone bida di e hóbennan riba riel. Den esei e ta enfrentá e difikultatnan di su propio afekshon i de bes en kuando tambe kriminalnan hopi sabí i astuto riba su kaminda. Un pelíkula ku hopi bes ta kómiko, de bes en kuando krudo i riba tur kos e ta intensamente konmovedor.

Short Movies BIG Stories (SMBS) ganadónan premio Hurado 2015

For di e 18 sinenan ku a keda mandá pa e kompetensia di sine kòrtiku kaminda e organisashon ta bai en buska di talento fílmiko lokal hurado a skoge e 3 ganadónan di premio di hurado. E sinenan akí ta partisipá na e premio di Públiko 2015 i ta keda proyektá durante e festival previo na e nominadonan di Yellow Robin Award. Na e presentashon e públiko presente por indiká su apresiashon riba un karchi di sker. Ta anunsiá e ganadó di e premio di públiko djasabra 28 di mart 7’or di anochi.

Ganadónan di premio di Hurado 2015 pa género:

Fikshon: Distansia – tema: My Name is… di Miguel Gonzalez Perret Gentil, Elizabeth Francisco i Kathelyn Amarica. Segun e hurado un sine hopi original i kreativo ku un elaborashon sorpresivo di e tema ku bunita trabou di kámara i bon aktuashon. Dokumental: Press on Marelly – tema My Name is… di Romeo Welvaart i Minchenou Welvaart. Hurado a haña esaki un sine informativo i riba tur kos positivo ku ta haña balor agregá èkstra pa motibu di tur e negativismo ku tin aktualmente den mundu (polítiko) i di deporte. Music Video: Fellow ft Ritmo Real – Hasi manera bo no sa, tema Neighbors, di Selwyn de Wind, Michael Lampe i Nestor Evelyn. Hurado ta haña esaki un sine bunita den kua tur kos ta kuadra, trabou di kámara muzik, bon elaborashon di e tema. Benta di karchi pa e festival ta start djasabra 21 di mart 10 or di mainta na e lokalidat di festival na The Cinemas kaminda por haña tambe buki di programa ku ta optenibel. Por haña e programa tambe riba e website www.curacaoiffr.com.