Djádumingu último durante un final hopi eksitante di e kues di kalkulashon di “Tur Ta Konta”, Dr. Albert Schweitzer School a resultá e ganadó.14 kalkuladó di grupo 8 a kompetí ku e timnan di kalkulashon di Berg Carmel College, Johan van Walbeeck School, i HJA Schroederschool.

Maske na kuminsamentu e tim tabata hopi nervioso, huntu nan a para fuerte i a gana e premio mayó di f. 5.000,- di spònser ENNIA. Jayden, miembro di e tim di kalkulashon: “ e premio mayó ei ta hopi great, pero bo ta hasié pa e honor tambe.”

E aña akí pa promé bia Fundashon Tur Ta Konta a organisá un kues di kalkulashon pa alumnonan di grupo 8 di skol básiko. Fanátiko- i televidentenan tabata sintá na punta di nan stul durante e 4 buèltananan di kalkulashon durante e final, ku TeleCuracao a transmití bibu. Ku e kues e fundashon ke pone atenshon na importansia di bon preparashon pa loke ta kalkulashon. Gilbert Martina, managing director di ENNIA, ta apoyá e inisiativa, mas ainda pasó investigashon ta mustra ku e abilidat pa por kalkulá bon ta krusial pa desaroyo di kada mucha i di hinter komunidat.

Partisipá na e kues tin, sigun jùfrou Petra di Dr. Albert Schweitzer School, hopi bentaha: “ Pa nos alumnonan ta un eksperensia tremendo. Nan ta siña kolaborá bon ku otro i ta siña dil ku strès. Banda di esaki e konfiansa den nan mes ta oumentá i nan ta bon prepará pa EFO-toets, (Eindtoets Funderend Onderwijs).

E skol ta dediká hopi atenshon na kalkulashon i ta traha ku e método moderno “Alles telt” Banda di esaki ta stimulá e muchanan pa hasi weganan digital di kalkulashon. Jùfrou Petra: “Esaki ta e prueba ku nos ta riba bon kaminda ku nos enseñansa pa loke ta kalkulashon.

Yes, nos ta bai gana!

Pa e kues di kalkulashon e alumnonan mester a konta lihé i sabí for di kabes, hasi tareanan di redakshon, i solushoná tareanan geométriko. Esakinan nan a hasi tantu komo individual komo den grupo. Kirsten a konta orguyosamente ku e no a hasi niun fòut den final, i Brend a kome su nervionan pone un banda ku chukulati, di manera ku e final a bai hopi bon pa e tambe.

E echo ku a transmití e kues live na televishon, e tim hóben di kalkulashon a haña super eksitante pero tambe leuk. Joel: “den e delaster ronde di kalkulashon Johan van Walbeeck School a hasi un eror ora di kalkulashon for di kabes, i nos no. E ora ei m’a pensa: Yes, nos ta bai gana!

E kues “ Tur Ta Konta” ta pone atenshon na talentonan riba tereno di kalkulashon na Kòrsou. Banda di esaki Fundashon Tur Ta Konta ku su coachnan di kalkulashon boluntario for di mundu di negoshi i gobièrnu ta yuda hopi alumno ku ta netamente suak den kalkulashon. Ku semanalmente un ora èkstra guía pa ku kalkulashon ta logra resultadonan sorprendente i sifranan di e alumnonan suak ta skit bai laria. Asina ta stimulá i rekompensá e alumnonan tambe.

Pa e premio mayó di f. 5.000,- ta buskando un bon destinashon ainda. E alumnonan di grupo 8 mes ta traha un plan i pa esaki ta hasi investigashon riba un wèpsait ku ta bende diferente tipo di material pa skol.

Dr. Albert Schweitzer School ta super orguyoso di nan alumnonan i e premio mayó ku nan a gana ku e kues di kalkulashon Tur Ta Konta. Jùfrou Petra: Nos tin tur konfiansa ku nos tim eksitoso di kalkulashon ta buska algu bunita pa e skol ku e premio di sèn di ENNIA.