WILLEMSTAD – Djamars anochi a drenta e notisia tristu ku e konosido Patrick Janzen a bai laga nos i den oranan di mardugá djarason 9 di yüni 2022, e pianista, kompositor i areglista Eddy Mar a bai sosegá.

Patrick Janzen

Pa lokual ku ta trata e personahe di Patrick Janzen, nos a komprondé ku el a fayesé na un edat di 53 aña na su kas, despues di tabata hospitalisá pa algun dia.

Patrick a bai laga nos na un edat relativamente hóben i durante su trayektoria den farándula, e tabata envolví den diferente aktividat farandulero tantu aki na Kòrsou komo na Ulanda.

Patrick a inisiá ku su negoshi i pone lus i harma stage pa diferente aktividat i seguidamente ela formalisá su aktividatnan ku lantamentu di Ola ku ta nifiká Organisashon pa Lanta Ambiente.

Patrick tabata pone zonido i meks pa diferente agrupashon musikal i  un di su éksitonan grandi tabata lantamentu di e Agrupashon Musikal No Game, ku a kosechá hopi popularidat i hasta a konkista e titulo di Rei di Tumba ku Reinir Lijfrock komo kantante na 2006.

Último tempunan aki, Patrick a lanta un grupo musikal di Bachata i tabata tin intenshon tambe pa lanta un grupo di Kòmbèk i formalisá regreso di No Game. Lamentablemente e no por a logra realisá tur su soñonan

Eddy Mar

Pa loke ta trata fayesimentu di Eddy Mar,  AMAK por menshoná ku e tabata hopi aktivo tantu komo músiko, pero tambe durante mas ku 10 aña komo dosente di e proyekto di Formashon Musikal den Bario.

Eddy Mar tabata forma parti di diferente agrupashon musikal i  esnan ku sigur el a kosecha hopi éksito ku n’e tabata e agrupashonnan musikal Dynamics i BESS ku tabata un agrupashon musikal ku e i defuntu Mr. Babalu tabata dirigí musikalmente.

Eddy Mar durante último tempu ku a pasa tabata sufri di kebrante di salud i den oranan di mardugá di djarason el a bin fayesé.

Direktiva di AMAK ta ekspresá su sentido de pésame na famianan di Patrick Janzen i Eddy Mar. Ku nan alma sosegá na pas.

Direktiva di AMAK