Willemstad – Riba djarason 17 di aprel Curaçao Lions Club a anunsiá su gran aktividat pa rekoudá fondo na prensa ku ta titula “Don’t Worry, Be Happy” presentá pa e gran komediante Roué Verveer ku na Hulanda i Sürnam a yena sala na varios okashon. “Don’t Worry, Be Happy” ta un presentashon spesial  Ku Roué a adapta pa  Korsou. “Don’t Worry, Be Happy” ta tuma lugá dia 30 i 31 di mei na Landhuis Brakkeput Mei Mei pa 8 or di anochi. Porta ta habri mitar di ocho.  

Banda di ta un komediante Roué Verveer ta aktor, autor, entertainer pero manera e mes ta bisa un persona alegre. Komo autor e tin un bestseller na su nòmber ku ta e buki: “Waarom? Daarom!”.

Roué Verveer na algun otro okashon a bishitá nos isla i a indiká ku ta enkantá ku Kòrsou. Ku e show “Don’t Worry, Be Happy”, Roué ta hiba’bo den su mundu di humor asina lubida un ratu e problemanan di tur dia. Nos tur ta pasando den situashon difísil, pero ku e show aki nos ke korda nos komunidat ku hari ta importante i bon pa salú. Hari ta duna nos bida alegria i ta duna nos speransa pa nos wak e kosnan dor di e brel positivo. 

Curaçao Lions Club ta un klup di servisio ku ta hasi diferente aktividat sosial manera entre otro  Bon Bisiña, Fundashon Duna E Mucha un Man, Senior Citizens Day, Leo Club i hasi donashon na diferente instansia karítativo.

Karchinan di entrada pa “Don’t Worry, Be Happy” ku Roué Verveer ta optenibel na Mensing’s Caminada, Van Den Tweel Supermarket Zeelandia i Janthiel, miembronan di Curaçao Lions Club na balor di NAF 60,- i online via TicketsCaribbean.com pa $34.

“Don’t Worry, Be Happy” ku Roué Verveer ta posibel danki na Curaçao Tourist Board (CTB), Papagayo Hotel, Sixt Car Rental i De Winter Liqui-Lung Advocaten. Pa mas informashon por wak e facebook-page di Curaçao Lions Club www.facebook.com/curacaolions