WILLEMSTAD – Na fin di 2019 kantante, outor di letra i kompositor Gilbert ‘Dibo D’ Doran i pianista, kompositor i areglista Randal Corsen a pone e base pa un proyekto musikal nobo ku nan a duna e nòmber ‘Muzik sin Barera’. E sineasta Selwyn de Wind a registrá kon den kuadro di e proyekto aki a realisá e produkshonnan, pero tambe kon tantu Dibo D komo Randal Corsen a krese te yega aya. Su dokumental tambe yama ‘Muzik sin Barera’. E no ta bai pasa djabièrnè mas manera informá anteriormente, pero TeleCuraçao a anunsiá ku e estreno awor ta tuma lugá riba promé Dia di Pasku di Resurekshon, djadumingu 4 di aprel, anochi 10 or, i ketu bai den ‘lockdown’.