Willemstad – E siman aki DOBLE R SSS lo zona hinter siman riba dos radio ora e popular lokutor Morgan Isenia presentá (un bia’ mas) durante di su shownan “Morgan Mainta!” riba ACTIVE 104.5 FM i “MAS Morgan!” riba MAS 99.7 FM un tremendo spesial ku solamente musika di DOBLE R SSS. Den kuadro di e homenahe na Rignald Recordino ku lo tuma luga’ otro siman Djawebs 28 di Òugustes durante Curacao North Sea Jazz, e presentadó radial lo ripití e gran dedikashon ku ya ela hasi na DOBLE R SSS den aña 2011. Durante hinter siman, oyentenan por skucha eksitonan grandi di DOBLE R SSS, sin ripitishon. Segun Morgan Isenia, e reto ta, pa tantu durante di e show mainta riba ACTIVE 104.5 FM i mèrdia riba MAS 99.7 FM mantené e oudensia ku solamente obranan di ún artista. Ademas sin no ripití niun piesa! Esaki ta demostrá un bia’ mas e don eksepshonal di nos Rignald Recordino. Durante di e programanan lo bai tin algun premio tambe pa fanatikonan di Doble i e oyentenan di “MM!”. Morgan Isenia a entrevistá tambe Rignald Recordino, Sidney “Mr.Saab” Isidora, diferente musiko i ku varios hende komun, riba e nifikashon di Doble R pa nan mes i pa Kòrsou. Pues un i tur ta invitá pa skucha, kanta, baila, rekordá i disfrutá durante hinter un siman largu ku musika di DOBLE R SSS. “Morgan Mainta!” ta tur dia den siman entre 6:30 pa 10am riba ACTIVE 104.5 FM i por skucha “MAS Morgan!” tur atardi entre 1 pa 3pm riba MAS 99.7 FM