WILLEMSTAD.- Mayan anochi 11’or den O’Mundo ta tuma lugá e promé presentashon di un proyekto musikal nobo di Axel Pikero. Trahando tur dia den músika i tumando na konsiderashon e bashí ku tin aktualmente den farándula, Axel Pikero a diseñá un proyekto musikal nobo ku ta un formashon musikal ku lo presentá práktikamente tur género di músika. ‘E variashon di músika ku lo keda presentá ta grandi. Nos lo ta presentando éksitonan di añanan 80 i 90. Piesanan di Earth, Wind & Fire, Stevie Wonder, Cher, Usher, Neyo, Pharrel, Juan Luis Guerra, Celia Cruz i mas lo zona’, asina Axel a splika. E repertorio lo ta un ekstenso ku músika pa baila, skucha i entretené e públiko. E formashon musikal lo konsistí fuera di Axel Pikero kende lo ta riba keyboard, Quincy Comenencia riba drùms, miéntras ku Tahnee Jane Rhodes i Danny Yanga lo ta e kantantenan.