Willemstad, Siman pasa Teater Luna Blou tabatin su tan gusta Movies under the Moon i Sombra di Kolo. Un anochi di dokumental ku tur hende a disfrutá. E siman aki nos ta kontinua ku e djaweps di pelíkula. Movies under the Moon lo presenta e tremendo pelíkula dokumental “Calypso Rose The lioness of the Jungle”. Calypso Rose ta e embahadora di músika karibense. E ta ser konsiderá un leyenda bibu di Calypso. E ta un figura karismátiko ku hopi biaha ta keda kompará ku e kantante di soulmusic Aretha Franklin. Un di e kantikanan konosí di Calypso Rose ta por ehèmpel “I say a little prayer for you” Calypso Rose a yega di kanta huntu ku e legendario Miriam Makeba. Nan dos huntu a kanta e tremendo hit “Voodoo Lay Loo” den añanan 80. E ta 19:00 di anochi kompletamente gratis i den airu liber bou di lus di luna. Aparte di esei nos tin Sombra di Koló – The Shadow of Color  di antropólogo Angela Roe i sinematógrafonan Selwyn de Wind i Hester Jonkhout. Kiko koló di kueru i rasa ta nifiká awe’n dia? Antropólogo Angela Roe ta buska un kontesta. Durante su búskeda dor di e bario nan Barber, Seru Fortuna, Otrobanda, Janwe i Spaanse Water trinta Yu di Kòrsou ta konta nan historia. Sombra di Koló ta un produkshon di Warwarú́ ImageNation Foundation, un fundashon nobo ku ta traha ku e bunita ademas ku e doloroso aspektonan di nos herensia kolonial. Ku Sombra di Koló Warwarú́ ImageNation Foundation ke krea persepshonnan nobo; di un banda saliendo for di e orguyo i plaser ku nos ta sinti pa ku e diversidat ku nos ta forma parti di dje kada dia, anto di e otro un banda e doló, berguensa i frustrashon ku hende ta sinti – tin bia diariamente – komo konsekuensia di nan koló. Sombra di kolo ta 20:00, entrada ta Naf 13,50. Karchi optenibel na Teatro Luna Blou. Tur hende ta keda kordialmente invitá pa un anochi di pelíkula. E Sali trempan pa bo dal bo pan ku stoba òf galiña, e sòpi i e variedat di kos di kome  ku Luna Blou su terras ta ofresé i tambe e bar bon surti. Pues bo no tin niun doló di kabes sali trabou bai kas refreská i bin trempan dal bo pan i bin pasa un ratu ameno na Luna Blou. Pa mas informashon por bishita nos página wep :www.lunablou.com òf yama nos na 462–2209.