Despues di su estudio na Akademia di Sine di Amsterdam Jan de Bont a logra fama pa su trabou ekstraordinario komo kamarógrafo di e pelíkula klásiko ulandes Turks Fruit (Paul Verhoeven, 1973). E pelikula a haña un nominashon Oscar komo e mihó pelikula stranhero i na 1992 e la haña e premio komo e mihó pelikula ulandes di siglo. Djei a sigui mas eksito, huntu ku regisor Verhoeven ku entre otro e pelikulanan De vierde man (1983) i despues ku ambos a bai biba na Hollywood  a sigui, Basic Instinct (1992). Rònt mundu De Bont ta konosí pa su tremendo trabou komo kamarógrafo i pa su trabou kolorido i moveshonnan super rapido ku kamara. Den pelikulanan grandi di akshon e ta un maestro ora ta trata trabounan di eksploshon, stuntnan i esenanan di akshon manera den entre otro , Die Hard (1988), The Hunt for Red October (1990) i Lethal Weapon 3 (1991). Den 1994 Jan De Bont ta logra eksito grandi ku e pelíkula di akshon Speed, sigui dos aña despues  ku Twister un pelíkula di akshon ku yen  ‘special effects’ tokante un tornado. Hasiendo uso di imahennan for di su propio obranan, Jan de Bont lo konta den e Masterclass tokante su trabou komo kamarógrafo, regisor i produktor di sine.