Lo presentá hopi piesa konosí bieu i nobo

WILLEMSTAD – Djadumingu dia 18 desèmber lo ta dominá pa e fiesta sentenario di Maduro & Curiel’s Bank. Henter dia lo tin hopi músika i tur sorto di otro aktividat interesante na diferente sitio den Punda i Otrobanda. Pa klousurá e programa festivo ekstenso e pianista Randal Corsen ta presentá ku un berdadero Big Band ku lo interpretá hit lokal tantu di antaño komo nobo. E presentashon aki ta programá pa mitar di 7 di anochi na Awasá pa despues 8 or di anochi sera e dia ku un show visual sin presedente.

Hopi biaha ta usa e terminologia ‘big band’ robes. No ta kualke banda ekstendé pa definishon ta tambe un ‘big band’. E pianista di jazz Randal Corsen a haña di MCB e enkargo pa forma un big band latino (manera di Tito Puento, Perez Prado, Mario Bauza i Machito) konsistiendo di 13 supladó (4 trompèt, 4 trombon, 5 saksofon) i un sekshon rítmiko konsistiendo di piano, bas, guitara/kuarta, drùm i perkushon, kompletá pa vokalista. E konsierto aki mester sirbi komo vürwèrk musikal di e dia aki. Esnan ku a eksperensiá Metropool Orkest ku e homenahe na Rignald Recordino i despues e homenahe na Gerard Palm i Rudy Plaate por imaginá kiko e ta bira. Den tur e kasonan aki Randal Corsen a fungi komo areglista i lider.

Durante un ora i mei ta deleitá e públiko ku un variedat grandi di piesa lokal konosí ku a pega den kurso di añanan. Den selekshon di nan a tene kuenta pa variedat, manera  tumba, son montuno, wals, tambú, etc. A skohe músika di vários banda i kompositor lokal. Sin bai den detaye por bisa ku ta presentá piesa di entre otro Estrellas del Caribe, Boy Dap, Kimo Candelaria, Doble R, Chin Behilia, Gibi Doran i Arnell & Su Orquesta.

E kantantenan ku komo solista ta interpretá e piesanan bieu i nobo ta Yumarya Grijt, Rich Pieter i Dibo Doran – nan ta forma tambe e koro pa e wéspetnan ku ta bai presentá algun di nan hitnan resien. Ta trata aki di Area 51, pero e chèri riba e bolo ta naturalmente Izaline Calister.

For di e selekshon di e artistanan por dedusí tambe ku djadumingu awor lo tin atenshon pa piesa tantu nobo komo dje tempu aya durante e programa di un ora i mei riba e tarima prinsipal na Brionplein den Otrobanda. De paso, ta graba e konsierto aki den su totalidat pa por transmití esaki despues i pa traha un DVD riba su mes.