Kuminsando 28 Novèmber pa 1 Desèmber…

Willemstad – Si bo papia di máratòn musikal i di DJ, Robertico Martha sigur ta un di e nòmber nan ku ta zona. Ta fresku den memoria di un i tur kon dos aña pasa e konosido DJ aki, Robertico Martha a kibra un rekòrt musikal, ku su DJ Máratòn. Tabata un tremendo hazaña ku a haña atenshon di henter Kòrsou. Tur esaki a tuma lugá den kurason di Saliña, Restaurant Ole Ole kuminsando dia djaweps 28 novèmber pa 10’or di mainta i terminá djadumingu promé di desèmber pa 6’or di atardi.

Selebrashon
E aña aki, Robertico un bes mas ta bai surpasá su mes i kibra e rekòrt ku e tin riba su nòmber tokando for di djaweps te djadumingu  non stòp. Tur esaki enkonekshon ku selebrashon di 20 aña Ole Ole Restaurant i pa un bunita kousa. Durante e fin di siman aki lo tin presentashon di MamyLUV, Spice and Pepper, Típiko Pasa Bon, Los Bandoleros i tambe Karaoke pa kompletá e selebrashon. Tambe ta bai tin un presentashon speshal djasabra 5’or di atardi di ‘Streanan di Oro’ kual ta e agrupashon musikal di SGR/Fundashon Verriet.

Ole Ole Restaurant
Ole Ole Restaurant, situá den kurason di Saliña konosí pa su bon ambiente i tambe platonan delisioso, e aña aki ta selebrá 20 aña di eksistensia. E konekshon entre Robertico i Ole Ole ta unu ku semper a kana sublime. Manera nos a hasi menshon anterior, e promé hazaña maratóniko di Robertico a tuma lugá einan selebrando al mismo tempu 18 aña Ole Ole. Mas ku klaro, na momentu ku Robertico a yega na e idea briante pa kibra su propio rekòrt i alabes kontribuí na un bon kousa ela aserka sr. Fito Roman di Ole Ole pa inkluí su selebrashon di 20 aña den su idea i pa huntu nan kristalisá esaki.

Fundashon Verriet
Ta konosí, ku resientemente un suseso lamentabel a tuma lugá na Fundashon Verriet. Pa esnan ku no sa, Fundashon Verriet ta un di e sentronan pa nos hendenan ku un desabilidat aki na Kòrsou. E fundashon aki, ta brinda oportunidat na e klientenan pa rekreá i desaroyá nan mes hasiendo uso di un struktura speshal krea pa nan. Tur e fondo ku wòrdu rekoudá durante e kuater dianan di e máratòn, ta destiná pa e fundashon aki pa asina nan por amplia nan programa i sigui brinda e klientenan un mihó servisio i kontribuí na nan desaroyo. Mas ku klaro na momentu ku esaki a wòrdu trese dilanti na Fundashon Verriet dor di Robertico i gerente di Ole Ole, esaki a kai manera un sorpresa masha agradabel i ku Fundashon Verriet no tin palabra pa gradisí pa e gesto aki.

Spònsernan
Un danki di kurason ta bai pa Brosaun, Red Bull, UTS, Gazini i Sun Moon, Turbo Machineshop,  The New Radiator, Robby’s Lottery i tambe Massive. Kòrsou kompletu ta keda invitá na e selebrashon i hazaña aki i asina kontribuí na e bon kousa. Entrada ta un sonrisa i bon komportashon.