WILLEMSTAD:- Durante di e último simannan algun publikashon a wòrdu hasí relashoná ku un redukshon den komishon di rebendedónan di karchinan prepago di Digicel, esaki a okashoná un paro abrupto den e benta di karchinan prepago na diferente toko.  “Nos a hasi nos máksimo esfuerso pa por yega na un akuerdo nobo, e aserkamentu ainda no a duna e resultadonan deseá- pero nos ta keda optimista”, esaki di akuerdo ku Sr. Lute, CEO pa Digicel Dutch Caribbean. Digicel ta pidi su diskulpa pa e inkonbeniensia ku esaki por trese serka e kliente. “Nos ta trahando duru pa yega òf na- un akuerdo nobo ku algun tienda i minimarket, un aserkamentu diferente pa rekargá telefon den nos merkado òf negoshá ku un distribuidor nobo”.  Miéntras tantu, Digicel ta rekòrdá ku tin diferente otro manera pa rekargá telefon i ku tin minimarket ku si a sigui bende karchi di telefon normal. Si akaso e kliente yega na un minimarket òf toko ku no ta bendiendo karchi di telefon- diskulpa pa esaki. Por kumpra karchi di telefon na tur 3 establesimentu di Digicel; Megastore na Biesheuvel, na Tesoro Plaza St. Maria i tambe na Brionplein. Tambe serka tur rebendedó di Digicel òf por hasi uso di sistemanan elektróniko. Pa rekompensá pa e inkonbeniensia ku e situashon aki por trese pa e usuario, Digicel ta regalá e kliente 10% èkstra na momentu ku e kliente rekarga. Esaki durante di 4 dia- for di dia 18 di yüli te ku 21 di yüli riba e promé bes ku e kliente rekargá. Por hasi esaki fásilmente na diferente ATM, na diferente establesimentu via di pagomátiko òf via di e wepsáit di Digicel http://www.digicelcuracao.com i primi “Services”/ “Top-Up”. “E situashon tin nos atenshon; nos ta spera ku pronto tin un solushon práktiko i un akuerdo na unda ku ámbos partido ta sali mutuamente benefisiá”, asina Sr. Lute, CEO pa Digicel Dutch Caribbean a finalisá.