Tropical Bottling Co. A lansa campaña nobo cu imagen nobo pa cerbes Chill. Chill ta comparti e emocion di su imagen nobo cu un oferta historico!

ORANJESTAD, Aruba – 1 di Februari 2018: Tropical Bottling Co. tin su prome campaña di aña y esaki ta valido solamente p’e temporada di carnaval. A lansa e imagen nobo di cerbes Chill, di cual tin un logo nobo. E siman aki a presenta e logo nobo di Chill na empleadonan y prensa.

Tropical Bottling Co. pa lunanan tabata traha riba e “relaunch” di cerbes Chill, unda cu a dicidi for di aña pasa cu pa 2018 lo trece un imagen nobo den su totalidad p’e cerbes, cual ta trata boter, caha y bleki, six pack y diseño. Durante e evento pa empleadonan di Tropical Bottling Co. a mira e cambionan haci, mientras cu diabierna riba mercado pa consumidor completo y asina tur hende na Aruba por mira esaki y gosa di dje, asina representante di Tropical Bottling Company, Mitch Bermudez a expresa. A cambia e imagen pero loke ta e producto, esta e likido, no a haci cambio riba dje.

Diabierna awo e campaña ta cuminsa pa publico, aunke cu diaranson atardi caba e truck di Balashi a core rond riba e ruta di carnaval na Oranjestad. E truck tabata ofrece e deal nobo, cual ta cumpra 5 caha y haya 3 gratis of cumpra 10 caha y haya 6 gratis. Asina aki diabierna Tropical Bottling Co. ta introduci e rebranding nobo di cerbes Chill den mercado.

Despues di a cumpra e cerbesnan, cu e recibo e consumidor ta bay na Balashi y unda cu pa cada caha nan ta haya 2 T-shirt. E deal aki ta un “lifetime” p’e temporada di carnaval, unda cu consumidornan por stock nan mes pa asina tin nan cerbes Chill p’e paradanan.

P’e imagen nobo di Chill, Tropical Bottling Co. a bin cu un slogan nobo esta “Chill, life is good”. Tropical Bottling Co. ta moviendo for di e slogan “It’s an island thing”, asina el a expresa. E idea pa bin cu e slogan aki tabata pasobra e cerbes ta free, no ta estrecho y e ta “excitement”. Ora un hende bebe Chill, hende kier relaha nan bida y “nos ta bisa cu tur hende ta riba un chill”.

E gran parti di cambio p’e imagen ta e logo, di cual esaki ta ticketed riba e boter. Mitch Bermudez a expresa cu nan no kier a bay leu di e logo anterior, esta e colornan, y con Chill semper a mustra. “Ora cu bo bay mucho leu for di con bo ta mustra, bo por confundi esunnan cu ta uzo bo producto”. A keda cu e mesun colornan, pero e imagen nobo tin un cambio di cual a haci uzo di otro tipo di font pa asina yega na un imagen nobo cu ta refrescante.

E campaña aki di cumpra tanto y haya tanto caha di cerbes Chill ta solamente p’e cerbes den boter y no esunnan den bleki. Tropical Bottling Co. ta recorda tur hende pa disfruta di e oferta aki p’e temporada di carnaval. Despues di e presentacion di rebranding di Chill, empleadonan y prensa a disfruta di e canticanan di Le Groove, di e snacknan y di e cerbes Chill. Tambe tur hende a saca potret na e photo booth di Chill pa tin esaki como recuerdo.