Bini uno bini tur diabierna awor riba Linear Park

ORANJESTAD, Aruba – 11 di October 2017: Pa añanan caba ta tuma luga e Paranda di Balashi cu semper tin un apertura grandi, pero e aña aki esaki lo ta mas grandi. Representante di mercadeo di Balashi, Mitch Bermudez, a expresa cu esaki ta bin pa motibo cu nan ta tene nan apertura mas trempan y ta haci esaki hunto cu e programa di radio y television Na Drempel di Fin di Aña.

Diabierna awo, 13 di October, e evento lo tuma luga na Linear Park desde atardi. E Paranda di Balashi ta consisti di 10 evento y e prome lo ta diabierna awo, cual lo termina e di dos siman di December. E Paranda di Balashi lo dura 10 diabierna, esta 10 siman. Lo tene e eventonan aki na diferente Café, cu Balashi lo avisa despues unda esaki lo ta. Pa loke ta e apertura y clausura lo tin diferente banda y gruponan di gaita, pero e otro 8 evento lo tin bandanan di tur biaha esta Grupo di Betico y Rincon Boys. E Grupo di Betico a perde e aña aki nan bos principal, esta Tommy Croes, pero asina mes nan a dicidi di sigui cu e tradicion. Balashi ta contento cu e grupo lo participa.

Durante e Paranda di Balashi lo conta un siman cu Rincon Boys y e siguiente Grupo di Betico, di cual nan lo ta poniendo ambiente prome cu e temporada di Pasco y Aña Nobo. Hunto cu Grupo di Betico pa diabierna awo, lo conta cu Gaita Rumbera, Muchanan di Mama Rosa, Gaita Autentico, Metropolis, DJ Vibes, Robert y Su Solo Banda Show, N’Fuzion y Tsunami. Tambe e anochi aki lo conta cu e presencia di Santa Claus p’e muchanan.

E evento lo cuminsa pa 5:00 PM y ta bay te den oranan di anochi. Lo bay tin 2 stage dilanti e Cafénan, unda cu e bandanan lo toca tras di otro. Aña pasa a cuminsa cu e manera aki y esaki a bay bon. E Cafénan lo tin prijs special riba e productonan di Balashi. Superfood tambe lo ta presente partiendo “kerst stollen” pe prome 100 personanan presente, pero tambe lo tin tentnan cu diferente cos di come tradicional y pa temporada di Pasco. Lo bay tin special riba productonan di Balashi na tur café riba Linear Park. Muchanan lo disfruta di e anochi aki unda cu Santa Claus lo ta presente.

Na Drempel di fin di Aña ta un produccion di e emisora Magic FM, cu e dinamico presentado Erin Croes, cu e aña aki ta transmiti e programa pa di 29 aña consecutivo. E programa ta pasa tur dialuna, diaranson y diabierna cuminsando for di 6:00pm te cu 10:00pm. Eyden tur bandanan musical, cantantenan y tur compania cu ta ofrece productonan of servicionan rond di celebracion di fin di aña ta topa. Na Drempel di fin di aña ta marca inicio di e temporada di paz y amor, e temporada di Pasco. Lo por sigui e programa riba e fechanan menciona via radioemisora Magic 96.5 FM y iTV Canal 49 riba Cable TV.

Paranda di Balashi y Na Drempel di Fin di Aña lo ta celebrando cu henter un pueblo e grandioso apertura di e temporada mas dushi y bunita, esta fin di aña. Asina ta yega diabierna desde 6:00 PM na Linear Park y bin disfruta di e ambiente dushi cu Paranda di Balashi.