WILLEMSTAD – E kompania di seguro Inter-Assure Insurance a kaba di sera su atministrashon di 2014, i ku aprobashon di BDO Accountants aserka, direktor Justus van der Lubbe ta anunsiá ku orguyo ku un biaha mas nan a registrá un resultado positivo. Na mes momento e ta prekupá pa e forma negligente ku ta atendé responsabilidatnan kousando ku otronan tin di karga e konsekuensianan. E ta boga pa tur hende karga responsabilidat pa nan mes aktitut, tambe den asuntunan ku por sigurá p’e.

“Si kada un di nos, kada individuo, kada empresario, kada gobernante, kada instansia karga su mes responsabilidat i konvertí e kompromiso ei den aktonan konkreto, bida na Kòrsou ta bira asina tantu mas dushi. E otro realidat ta ku hopi hende ta hasi i deshasí numa, i nan ta benta e konsekuensianan kostoso di nan aktitut deskabeyá pa otronan. Por ehèmpel den tráfiko”, segun señor Van der Lubbe. El a yega di splika e Minister di Hustisia ku tanten ku no ta tuma tèst di uzo di alkohòl, usadónan iresponsabel di kaminda ta logra bula pipa fásilmente. E kompania di seguro ta obligá na paga si no tin sufisiente prueba di un aktitut iresponsabel den tráfiko, pero e no por trese bida di hende bèk ku muri den tráfiko. Asina ta laga komunidat i otronan kargá ku e sufrimentu i e gastunan kousá pa e daño, miéntras esnan responsabel ta sinta bèk tras di stürwil manera nada no a pasa. Pa por kompará: gobièrnu di Fransia a obligá un aparato pa tèst uso di alkohòl den tur outo pa redusí e kantidat di aksidente ku alkohòl envolví. Esei lo mester ta posibel na Kòrsou tambe.

Responsabilidat profeshonal

A base di prinsipionan komparabel Inter-Assure ta operá diariamente: sirbi e klientenan, grandi i chikitu, ku e mihó produkto i konsehonan basá riba un aserkamentu profeshonal i integridat. Bou di tur sirkunstansia ta pisa e interesnan di e klientenan, e empleadonan, e relashonnan di trabou i e komunidat den e proseso pa tuma desishon. No tin indikashon ainda ku ekonomia lo drecha, pero Inter-Assure ta sufisiente fleksibel tambe bou di e sirkunstansianan aktual pa sirbi su klientenan mas ku simplemente manera debe ser. Kisas ta tempu pa konsientisá komunidat mas di e importansia di seguro. Konsumidónan por i hasta ta rekomendabel pa nan puntra profeshonalnan manera abogado i akountentnan si nan tin un seguro di responsabilidat pa profeshon. Di mes manera, lo por spera ku kualke asosiashon di doño òf empresanan ku tin un hunta di direktiva òf komisario tin un pakete asina pa responsabilidat di dirigentenan, segun Justus van der Lubbe. Sobrá di mundu no por sin dje mas, awor falta Kòrsou ainda.

Relato di aktuario

Inter-Assure por broma ku e komo úniko kompania di seguro na Kòrsou i Sint  Maarten a agregá un relato di aktuario na e relato anual di 2013. Na e relato di e aña ekonómiko 2014 ku nan a kaba di sera tambe nan a agregá un sertifikado di Couperus Actuariële Adviesgroep. Loke por saka afó di esei ta ku Inter-Assure tin un portafolio sano i ku un norma di solvensia di 141% nan ta bastante sólido pa por yuda klientenan ku haña nan ku kontratempu. Den 2014 Inter-Assure a logra un resultado positivo di mei mion florin.