Willemstad – No ta deskonosí ku e direktiva di Fundashon Parke Tropikal ta pasando den tempunan difísil. E direktiva aki a tuma e over na fin di 2011 for di e direktiva anterior despues di tormenta tropikal Tomas ku a laga dañonan grandísimo na e parke. No opstante di esei nan a disidí pa traha huntu na bienestar di e parke i e bestianan. Parke Tropikal ta un patrimonio nashonal ku nos mester kuida. E direktiva ta keda positivo i ta sigui traha na su adelanto. Den e rueda di prensa ku direktiva di e fundashon a tene por a nota e positivismo bou di e miembronan di direktiva no opstante tur e retonan grandi ku nan ta enfrentá prinsipalmente esun finansiero.  E direktiva ta konsistí di Ivan de Windt, Mem Vornis, Mariela Romero, Allan Raposo, Aichel Magdalena, Gino Nivellac i Stanley Ignacio. Den palabranan korto i alkaso presidente di e direktiva señor Ivan de Windt a splika e situashon finansiero ku e fundashon ta pasando dor di dje. Mester yega na un solushon struktural sino no ta keda nada otro di sera e parke, algu ku e direktiva aki no ta para pe. Básikamente a splika ku sifra ku e supsidio mensual no ta pa kubri e gastunan operashonal mensual. E supsidio di 18 mil florin mester kubri gastu di salario nèto ku ta 16 mil, seguridat 8 mil, kuminda i kuido di bestia 6 mil, pagonan sosial, awa, koriente, debenan atrasá. Resultado di e rekensom aki ta ku e parke mensualmente ta krea mas debe, anto sin ku e parke por kobra entrada. Un situashon ku e direktiva a pone na atenshon di gobièrnu na vários okashon. Mariela Romero, sekretaria di direktiva a splika ku tur esaki a kondusí ku mester a hasi ehersisionan pa baha gastu i subi entrada. Un di e ehersisionan ei lamentablemente ta di redusí den gastu di personal. Algu di entretantu a keda solushoná i ku a yega na areglo satisfaktorio ku intermediashon di sindikato PWFC pa tur partido. A hasi diferente ehersisio pa baha gastu dor di traha riba nan mes hòfi di fruta i berdura. Mester yamá danki na tur e tantísimo persona, instansia, famianan, kompanianan i medionan di komunikashon ku a yuda parke den e último añanan sea ku sèn, material, trabou boluntario, publisidat i tur e palabranan di aliento i positivo ku nos ta hañando. Pa menshoná algun Centrum, Goisco, ku tur mèrdia ta manda fruta, berdura, pan etc ; Jansen de Jong, Rabobank, Girobank, MCB, UTS, Jack Hanna, Operashon Street legal, Apache Heavy Equipment i hopi mas. Parke Tropikal ta estrechando lasonan ku dierentuin nan den region i Hulanda manera, Apenheul, Stichting Aap, Burgers Zoo, Avifauna, Dierenpark Emmen, Philip’s Animal Garden na Aruba, Paramaribo Zoo, Sto Domingo, Venezuela, Colombia, Miami Zoo i Columbus Zoo ku den mart Mariela i Bert ta hasi un entrenamentu kortesia di Jack Hanna. E kantidat di boluntario ku ta i ke duna un man den parke ta birando tur dia mas i direktiva di e fundashon ta sumamente agradesido na kada un di nan. Esaki ta nifiká ku Korsou tin dushi hende i ku Parke Tropikal ta biba den kurason di nos komunidat. A lanta Stichting Vrienden van de Dierentuin ku tin e meta pa rekoudá fondo pa Parke Tropikal pa medio di kampaña di standing order kaminda TUR banko na Korsou a koperá dor di eliminá e gastu di standing order Parke Tropikal a demostrá vooral durante e 2 último añanan aki ku e tin derecho di eksistensia. No solamente pa e parti di edukashon, formashon pero tambe e parti di rekreo familiar. Sin pensa mes e posibilidatnan turístiko pa futuro. Hubert Isenia, manager di parke a splika riba e trayekto importante ku ta di e Masterplan. Un plan ku ta benefisiá no solamente e parke pero henter e área di Damacor. Paso arkitektonan a inkluí e plan di afwatering di e área aki den e totalidat. Alabes e plan aki ta inkluí e parti di seguridat, infrastruktura,  beyesa di e parke pero tambe e parti di hisa kalidat di bida di e bestianan dor di krea habitat nan mas grandi ku ta kumpli ku stándarnan internashonal. Ta trahando duru riba e parti di resosialisá e bestianan, un trabou ku no ta fásil paso hopi di nan ta bieu kaba. Pero ela sigui splika ku tin speransa paso tin un gran kantidat di bestia a nase i ta sigui nase danki na e bon kuido. “Pa falta di finansa nos no por traha riba e plan aki manera nos lo tabata deseá pero tur loke nos a hasi òf ta bai hasi ta fihá riba e plan maestro aki”, asina Bert ta finalisá. Direktiva ta konsiente di e realidat i e kouchinan pero úniko kos ku e ta pidi komunidat i esnan ku ta bishita parke, pa respetá e bestianan i e matanan. Por último direktiva a anunsiá ku e parke no por habri mas pa motibunan ku e trabou a tuma mas tempu ku a verwacht. E fecha nobo lo keda anunsiá ora tin un bista kla di e trabounan. E bestianan lo keda bon kuida i tur ku e duna un man pa nos por habri nos portanan mas lihé sea den forma finansiero, material òf trabou boluntario ta bon bini. Un nota positivo ta ku Minister Whiteman a hasi un sita pa sinta na mesa ku e direktiva djamars dia 4 di febrüari pa por yega na un solushon struktural pa Parke Tropikal.

31 di yanüari 2014