Aña 2020-2021 ta bira un aña special pa Rotary Club Willemstad. Durante Change of the Board e dos presidentenan (Benno van Leeuwen i Rob Kouijzer) a anunsiá ku huntu ku e direktiva i diferente komishonnan, nan lo pone man na obra pa inkorporá e 7 puntonan di atenshon di Rotary International den tur nan aktividatnan. E 7 puntonan di atenshon ta: maneho di Pas i Konflikto, Prevenshon i Tratamentu di Malesa, Awa, Sanitario i Higiena, Salú di Mama i Yu, Enseñansa Básiko i Alfabetisashon, Desaroyo Sosial i Ekonómiko, i Medio Ambiente. Antisipando riba e punto di atenshon pa Medio Ambiente, Rotary Willemstad a laga traha tas di plèstik resiklá ku ta mustra e teksto: “Bai flit, ku bo plèstik”. A ofresé esakinan na Myrthe Verhulst i Corine Senior di Clean up Curaçao i Berry Wouters,  fundadó di Daily Meal Project.

“Ku e tas akí nos ke pone atenshon riba tur e plèstik ku ta shusha nos naturalesa, i oumentá e nivel di  konsientisashon pa loke ta proyektonan di resiklahe eksistente i sostené esakinan tambe.”, sigun Rob Kouijzer.

Banda di atenshon pa medio Ambiente, Rotary ta sostené, mirando e krísis aktual na Kòrsou, e proyekto  Daily Meal Project. Organisando e Change of the Board di otro forma i hasiendo proyektonan huntu, por a spar 30% riba e presupuesto. Asina por a hasi un donashon di 1.329,00 florin na Daily Meal Project.  Durante CuraDoet di djasabra último tambe Rotary a hasi un kontribushon. A fèrf e murayanan parti paden i renová plafònt di e edifisio di Daily Meal Project na Seru Grandi.

Riba potrèt Benno van Leeuwen, Corine Senior, Myrthe Verhulst, Berry Wouters i Rob Kouijzer. Pa mas informashon tokante Rotary Club Willemstad: rotarywillemstad@gmail.com