Willemstad, Djasabra último 2 di dezèmber tabatin e Gran Final di Luna Yen, e show di talento pa Hubentut ku a tuma lugá 8or di anochi na Zona Kultural sala La Tentashon. Un anochi karga ku talento kaminda Dilara Tramm a gana e premio máksimo di e kompetensha Luna Yen. Dilara a kanta su propio kantika ku tabata papia di ta liber “Freedom”. Promé finalista tabata The Royal Diamonds di baile, i di dos Finalista tabata Flow Magic ku tambe a baila.

Un total di 7 finalista nan a kompetí e anochi aki. E huradonan ku tabatin e difísil trabou pa skohe e ganadó tabata Abigahie Pinedo (Aktuashon), NJ (Baile) & Tyson Hill (Kanto), Niata Augusta (Kanto) i Segni Bernardina eks direktor di Teatro Luna Blou ( Baile i Presentashon General)

Aparte di e 7 finalista nan aki nos tabatin komo invitadonan speshal Dance Brothers ganadónan di Luna Yen 2016. Nan a presentá despues ku hurado a retirá. Tambe nos tabatin bishita di finalista nan di Gang di Arte, 297 crew (Aruba), nan a trese un pòtpuri di Baile ku un bunita mensahe su tras.

Un pabien na tur e hóbennan ku a hasi un tremendo trabou durante di e periodo di Luna Yen, un pabien na e ganadó di Luna Yen 2017 Dilara Tramm.  Un danki na e dosentenan ku a guia e hóbennan aki kual ta Eduar Reineta, John Nagtegaal i Leyozjandro Clemencia i danki na Kas di Kultura, Zona Kultural & Gobièrnu di Kòrsou pa hasi e proyekto aki posibel.